Թույլ չենք տա նոր զոհ․ մի ստիպեք, որ պոտենցյալ զորակոչիկների մայրերով փողոց դուրս գանք․ Նինա Կարապետյանց (տեսանյութ)
Ինչ-որ տարօրինակ բաներ են կատարվում բանակում։ Խոսքը մեր երեխաների մասին է, ովքեր, չգիտես՝ ինչ պայմաններում, զոհ են դառնում ոչ թե թշնամու գնդակից, այլ ներսում։ Այս մասին լրագրողների հետ զրույցում ասաց «Հելսինկյան ասոցիացիա» իրավապաշտպան հասարակական կազմակերպության ղեկավար Նինա Կարապետյանցը, ում նախաձեռնությամբ ակցիա էր կազմակերպվել՝ խնդրին լուծում տալու նպատակով։
Նինա Կարապետյանցի խոսքով՝ ոչ մի անգամ զոհերի թիվն այսքան մեծ թվի չի հասել, ինչպես այս մի 40 օրվա մեջ։ Իրավապաշտպանը հայտարարում է, որ այս ամենը պետք է բացատրություն ունենա, և այդ բացատրությունը պետք է տան պաշտոնատար անձինք՝ սկսած առաջին դեմքերից։
Նինա Կարապետյանցն ընթերցեց հայտարարությունը, որոց դատապարտում են տեղի ունեցածն ու պահանջում հանդիպում՝ ՀՀ վարչապետի, Պնախարարի, Դատախազի ու պատկան այլ մարմինների հետ։ Միևնույն ժամանակ իրավապաշտպանը նշեց, որ մինչ օրս զինվորի սպանության ոչ մի գործ ամբողջական բացահայտված չէ։
«Ասում են՝ 99 %-ով բացահայտել ենք․ ստում են, իրական մեղավորները բացահայտված չեն ու պատժված չեն, և դա է պատճառը, որ բանակում շարունակվում են նման դեպքերը»,- ասաց Նինա Կարապետյանցը։
Նրա դիտարկմամբ՝ գործի բացահայտման ուղղությամբ տարվում է ստանդարտ սցենար, որից ոչ մի քայլ այս ու այն կողմ չի գնում։
Կարապետյանցն անդրադարձավ նաև Նիկոլ Փաշինյանի հայտարարությանը, թե սպանությունների պատճառը՝ քաղաքացիական հասարակությունից բանակ եկած քրեական ենթամշակույթ պարունակող երիտասարդներն են։
«Ուզում է ասել, որ բոլոր ընտանիքներում գողականներ ու հանցագործնե՞ր են դաստիարակվում, ու այդ 18 տարեկան, կներեք արտահայտությանս համար, լակոտները կարողանում են տակնուվրա անել մի ամբողջ զորամա՞ս․․․ Պարոն Փաշինյան, եթե ձեր կառույց գա էդ բարքերով մեկը, և ցանկանա իրենը թելադրի ձեր փոխնախարարներին ու նախարարներին, դուք ի՞նչ կանեք էդ մարդուն, կարգի չե՞ք հրավիրի, ես իմ կառույցում կարգի կհրավիրեմ, բա ո՞նց եղավ, որ մեկ-երկու 18 տարեկանի չեն կարողանում կարգի հրավիրել»,- ասաց Կարապետյանցը։
Նրա խոսքով,՝քանի դեռ հիվանդ է կառույցն ու չի ընդունում իր մեղքի բաժինը՝ նոր զոհեր են լինելու․ «Մենք նոր զոհեր ունենալու ոչ ռեսուրս ունենք, ոչ ցանկություն և ոչ էլ թույլ կտանք։ Մի ստիպեք, որ պոտենցյալ զորակոչիկների մայրերով փողոց դուրս գանք, սա այն քայլն է, որին չենք ցանկանա գնալ»։
Մանրամասները՝ տեսանյութում