Փաշինյանը իմ կաբինետում սուրճ էլ է խմել, հիմա ես շողոքորթե՞լ եմ իրեն. չի կարելի անլրջացնել ամեն ինչ. Շարմազանով (տեսանյութ)
Փաշինյանից պահանջում եմ ներկայացնել Ղարաբաղի հարցի լուծման հայեցակարգը: Այս մասին լրագրողների հետ զրույցում ասաց ՀՀԿ մամուլի խոսնակ Էդուարդ Շարմազանովը: Նրա խոսքով՝ Փաշինյանն ամեն ինչ հավասարեցրել է ճտիկով գրիչի, զուգարանի ու հնդուշկայի մակարդակի՝ անդրադառնալով վարչապետ Նիկոլ Փաշինյանի վերջին հայտարարություններին ու ՍԴ շուրջ տեղի ունեցող իրադարձություններին:
«Փաշինյանը ցանկանում է կուլ տալ ՍԴ-ն, որովհետև ՍԴ-ն մնացել է փաստացի միակ կառույցը, որը ծառայում է ոչ թե Նիկոլ Փաշինյանին, այլ Հայաստանին և Հայաստանի Հանրապետության Սահմանադրությանը»,-ասաց Շարմազանովը:
Նրա խոսքով՝ Փաշինյանը հայտարարում է, թե ընտրվել է նախկին ԱԺ-ի կողմից, սակայն չի ասում, թե ինքն ում կողմից է ընտրվել. «իսկ ինքը ո՞ւմ կողմից էր ընտրվել, նա էլ է նախկին ԱԺ-ի կողմից ընտրվել։ Հին ու նոր է անում, բայց իր ֆրակցիայի կեսը հին է, իր թիմի կեսը ՀՀԿ-ից փախածներ են կամ տաքուկ անկյուններ փնտրողներ են. իրենից հի՞ն»,-ընդգծեց Շարմազանովը:
Լրագրողի հարցին, թե ինքը երբևէ նվեր գրիչ ստացե՞լ է՝ Շարմազանովը պատասխանեց. «Շատ հնարավոր է, որ ես էլ եմ ձեզնից գրիչ ուզել, դուք էլ եք ինձնից գրիչ ուզել՝ ի՞նչ է, շողոքորթե՞լ ենք իրար: Կամ Փաշինյանը իմ կաբինետում սուրճ էլ է խմել, հիմա ես շողոքորթե՞լ եմ իրեն.. սա անլուրջ է. չի կարելի անլրջացնել ամեն ինչ»:
Էդուարդ Շարմազանովը շեշտեց, որ ՀՀԿ-ականները երկիրը թալանելու գործով զբաղված չեն եղել.
«Մի հատ բոբո են սարքել՝ հանրապետականները կեղեքել ու թալանել են Հայաստանը։ Մեռանք ասելով՝ եկեք, իմ թալանածը գտեք ու կեսն էլ ինձ տվեք՝ իմանամ։ Այդ մարդկանց տպավորությունն այնպիսին է, որ մենք առավոտյան գնացել ենք աշխատանքի, բացել ենք բյուջեի սեյֆը, բյուջեն թալանել ենք, իրիկունն էլ թալանած գնացել ենք»։
Շարմազանովի խոսքով՝ Փաշինյանը որևէ հարցում չունի հայեցակարգ, բացի քանդելու գործում.
«Ինքը դասական մերժողական է, ինքը դասական քանդում է ամեն ինչ»: