Հունաստանի դեսպանատունը «քցելով» է զբաղված
2019-ի սեպտեմբերի 12-ին Վիզաների աջակցման կենտրոնի միջոցով՝ Հունաստան մեկնելու համար Շենգեն վիզայի ստացման հայտ ներկայացրի։ Կնոջս հետ որոշել էինք մեղրամիսն անցկացնել Եվրոպայում։ Մեր մտադրությունը, ցավոք, չիրականացավ։ Բյուրոկրատական քաշքշուկների միջով անցնելով, ներկայացրել եմ բոլոր անհրաժեշտ փաստաթղթերը, մերժում եմ ստացել անհեթեթ պատճառաբանությամբ։
Նշեմ, որ Վիզաների աջակցման կենտրոն դիմելուց առաջ նայել եմ Հայաստանում Հունաստանի դեսպանատան ընդունելության օրերը, որտեղ ցույց էր տրվում, թե ազատ օր չկա, այսինքն` մարդկանց դրդում են վիզայի համար դիմել վիզաների աջակցման կենտրոնի միջոցով։ Դիմելուց ընդամենը 3-րդ աշխատանքային օրը պատասխան եմ ստացել, հարց է առաջանում, այդ ինչպե՞ս եղավ, որ ծանրաբեռնված գրաֆիկով հասցրեցին ընդամենը 3 օրում ստուգել հայտս ու մերժել։ Ենթադրելի է, որ դեսպանատունը վիզաների աջակցման կենտրոնի հետ ներքին պայմանավորվածության համաձայն պարզապես զբաղված են ՀՀ քաղաքացիներին քցելով։ Այսինքն, ամենայն հավանականությամբ, չեն էլ ուսումնասիրել հայտս, այլ կամայական «պտիչկա» են դրել մերժման սյունակում ու հետ ուղարկել։
Եվս մեկ անգամ ընդգծեմ, որ ներկայացրել ենք պահանջված բոլոր փաստաթղթերը։ Հետևաբար՝ կարծում եմ, որ մերժումն ուղղակի խախտում է ՀՀ քաղաքացու իրավունքները։ Ուստի ԱԱԾ-ն և ԱԳՆ-ն այս առթիվ պարտավոր են պարզաբանում պահանջել նշված կառույցներից, պաշտպանել ՀՀ քաղաքացու՝ ազատ տեղաշարժի իրավունքը և Հայաստանի Հանրապետության՝ ազատ, ժողովրդավարական պետության հեղինակությունը։ Այդ նպատակով առաջիկայում դիմելու եմ նշված կառույցներին, մանրամասն՝ ներկայացնելով իրավիճակն ու ինձ մոտ առաջացած կասկածները։
Նշեմ, որ Վիզաների աջակցման կենտրոն դիմելուց հարցրի, թե որն է նրանց գործառույթը, պատասխանեցին՝ պարզապես հայտի տեղափոխում, և վերջ։ Ստացվում է, որ մոտ 12 հազար դրամ վճարել եմ 300 գրամ թուղթը մի քանի հարյուր մետր տեղափոխելու համար։
Հակոբ Մկրտչյան