Իմ միջոցով հայրս քաղաքական մեսիջներ չի ուղարկում որևէ մեկին. Լևոն Քոչարյան
«Մեկ տարի առաջ մենք բարձրաձայնում էինք այս խնդրի մասին ու մարդիկ լավ չէին պատկերացնում` ինչի մասին է խոսքը»: Այսօր, լրագրողների հետ զրույցում այդ մասին ասաց ՀՀ երկրորդ նախագահ Ռոբերտ Քոչարյանի կրտսեր որդին` Լևոն Քոչարյանը:
Հիշեցնենք, որ ՀՀ վերաքննիչ քրեական դատարանն այսօր որոշեց Ռոբերտ Քոչարյանի գույքի վրա դրված կալանքի հարցով ՀՀ դատախազության բողոքը մերժել։
Լևոն Քոչարյանը նշեց, որ բավարարված են դատարանի որոշմամբ, սակայն վերջնական բավարարված կլինեն, երբ բոլոր խախտումները, որոնք թույլ են տրվել մեկ տարվա ընթացքում` հարթվեն։
«Կարծում եմ` դատարանն այսօր օրինաչափ որոշում կայացրեց, և այդ որոշմամբ պարզ դարձավ քննիչի ու դատախազների փնթի աշխատանքը, քանի որ մեր գույքի վրա կալանք դնելու որոշումը անօրինաչափ է եղել»,–ասաց նա:
Դատարանի թույլ տված խախտումներից Լևոն Քոչարյանը նշեց արգելանքն իր ու իր եղբոր` Սեդրակ Քոչարյանի հաշիվների վրա։ Այժմ այդ արգելանքը հանված է:
«Ասում էին, թե այն, ինչ ունեք, Ռոբերտ Քոչարյանինն է»,–ասաց Լևոն Քոչարյանը։
Ինչ վերաբերվում է Ռոբերտ Քոչարյանի հայտարարությանը, թե իրեն զրկել են ունեցվածքից և ստիված է դատական ծախսերի համար դիմել հարազատների օգնությանը, ապա Լևոն Քոչարյանը նկատեց, որ խոսքը որոշ հարազատների ու այդ թվում նաև իր մասին է: Նա հավելեց, որ ֆինանսական խնդիրներ չունեն, բայց ստիպված են դատական ծախսերն անել նաև իրենց ունեցած խնայողությունների հաշվին:
Հարցին, թե տեսակցում է արդյոք նա իր հոր հետ և հայրն իր միջոցով քաղաքական մեսիջներ չի ուղարկում, կրտսեր Քոչարյանը պատասխանեց.
«Իհարկե տեսակցում եմ, բայց զրուցում ենք անձնական թեմաներից: Իմ միջոցով հայրս քաղաքական մեսիջներ չի ուղարկում որևէ մեկին»: