«Հեղափոխությունը» նմանվում է անհաջող ամուսնության. տղան թաթալաբազ է, «հարսը»՝ համբերող
Հայկ Զոհրաբյանը ֆեյսբուքյան իր էջում գրում է.
«Այս «հեղափոխությունն» արդեն իսկ նմանվում է մի անհաջող ամուսնության, և Նիկոլն իբրև ամենակարող փեսա՝ լի հեքիաթային խոստումներով և դեպի իր սիրտը գրավել կարողացող փուչ հնարավորություններով, ժամանակավոր շահեց հարսի՝ այսինքն հլու, հնազանդ, հանդուրժողականությամբ լեցուն ժողովրդի սիրտը։ Եվ ինչպես այսօր մենք ականատես ենք լինում բազմաթիվ ամուսնալուծությունների, որոնք տևում են ընդամենը մեկ֊երկու ամիս, հաշվի առնելով նաև այն հանգամանքը, որ կարող է ամոթը և դիմացինի կարծիքը սեփական կյանքում դեր ունենալ, կարող է ձգձգվել մինչև վեց ամիս։ Իսկ այդ ժամանակահատվածում փեսայի ընկերներն ու բարեկամները փորձում են հարսին ու իր բարեկամներին համոզել, թե մեր տղան լավն է, ուղղակի մի քիչ թաթալաբազ է ու անհաջողակ, եկեք այս անգամ էլ ներենք նրան և ամեն ինչ լավ կլինի։
Ահա այսպես շարունակ, արդեն մեկ տարի նիկոլն իր կողմնակիցների ու քայլող թիմակիցների հետ միասին փորձում են համոզել և կրկին սիրաշահել ժողովրդին, արդեն իսկ ամբիցիաներով ստիպում են, որ հավատան իրենց ժամանակին տված սուտ խոստումներին ու հեքիաթային ապագային, փորձում են անգամ «վախացնելով ու մատ թափ տալով, աշխատանքից ազատելով ստիպել հավատալ», թեև խելք ունենան, պիտի հասկանան, որ սերն արդեն իսկ մարել է, դարձել անտանելի և զզվելի, և քանի շատ են փորձում համոզել, այնքան զզվանքն էլ ավելի է խեղդում։
Շատերը ներեցին փեսային (նիկոլին) իր ընկերների «խաթեր», շատերը ներեցին փեսային իրենց ծնողի «խաթեր», շատերը ներեցին փեսային նոր փեսա չգտնելու «խաթեր», շատերը ներեցին փեսային քաղաքական դաշտում բարեկամ ունենալու «խաթեր», շատերը ներեցին փեսային իրենց ամոթի «խաթեր»։ Բայց եկեք ու տեսեք, որ անհաջող ամուսնությունը դժբախտացնում է այն ուրիշ մեկին, ով հույսով լեցուն սպասում է իր կյանքի ու ապագայի մշտնջենական ընտրյալին՝ բարեկեցիկ ու արժանավայել կյանքին։
Ամուսնությունը պետք է երջանկացնի և հարսին, և փեսային, և շրջապատի մարդկանց, այլապես բոլորը միասին կտառապեն, կչարախոսեն և մեկմեկու անվան հետ կսկսեն խաղալ անմնացորդ։
Հ.Գ անբաշար փեսան, փեսա չի՛ դառնա։
Հարգանքներով ու միշտ Անկեղծորեն Հայկ Զոհրաբյան»: