«Նեուժելի՞ մենք արժանի չենք փոխհատուցման»․ ԱԺ մաքրուհիները շարունակում են բողոքի ակցիան (տեսանյութ)
Ազգային ժողովի մաքրուհիներն այսօր՝ նիստի ժամանակ, հավաքվել էին նիստերի դահլիճի մուտքի մոտ` պատգամավորներին ներկայացնելու իրենց պահանջներն ու դժգոհությունները:
ԱԺ փոխնախագահ, «Բարգավաճ Հայաստան» խմբակցության պատգամավոր Վահե Էնֆիաջյանին դիմելով՝ նրանք նկատեցին, որ իրենց նկատմամբ վերաբերմունքն անարդար է։
«200 դրամով գալիս՝ 200 դրամով գնում ենք, մարշուտկա ենք վարձում, հիմա սոցփաթեթը կտրում են, պարգևավճար չենք ստանալու, բա մի փոքր փոխհատուցում հնարավոր չի՞ աշխատողներին տալ, նեուժելի՞ մենք արժանի չենք դրան»,- ասաց մաքրուհիներից մեկը։
Վահե Էնֆիաջյանը նկատեց, որ ոչ թե հնարավոր չի, այլ պարտադիր է այդ փոխհատուցումը։ Նա խոստացավ փորձել հարցին լուծում տալ, բայց հիշեցրեց, որ որոշողն ինքն ու իր ներկայացրած քաղաքական ուժը չեն: ԲՀԿ-ական պատգամավորն ասաց, որ կհանդիպի աշխատակազմի ղեկավարի հետ։
Կանայք տեղեկացրին նրան, որ արդեն իսկ իրենք էլ են հանդիպել այդ պաշտոնյաներին, սակայն նրանց տված պատասխաններն իրենց չեն բավարարել:
«Մեզ առաջարկում են ստանալ 40 000 դրամ աշխատավարձ, բայց աշխատել նաև այլ տեղերում։ Իմ առողջությունը չի ներում, այդ պատճառով 22 տարի է` այստեղ եմ աշխատում։ Ինձ հաճելի չի ուրիշի ոտքերի տակը ավլելը, բայց եթե ավլում ենք, կարելի է գոնե հարգանք դրսևորել մեր նկատմամբ»,- ասաց կանանցից մեկը:
Մաքրուհիները վստահեցնում են, որ պատրաստ են խզել պայմանագիրը նոր գործատուի հետ, պատրաստ են տույժ-տուգանքներ կրել միակողմանի խզած պայմանագրի դիմաց, ու նույնիսկ պատրաստ են մեկ ամիս աշխատել առանց աշխատավարձի, բայց դարձյալ վերադառնալ ԱԺ աշխատակազմ և ստանալ նախկին աշխատավարձերը: