Սասուն Միքայելյանը գրոհում է. քաղաքական որոշումը կայացված է
Ազգային ժողովի «Իմ քայլը» խմբակցության պատգամավոր, թավշյա հեղափոխության հաղթանակը Արցախյան ազատամարտում ունեցած հաղթանակից առավել և կարևոր դասող Սասուն Միքայելյանը գրոհում է ոչ միայն Երկրապահ կամավորականների միությունն, այլ նաև Հայաստանի թաեքվոնդոյի ֆեդերացիան:
Միքայելյանը արդեն իրեն պատկերացնում է այդ ֆեդերացիայի նախագահի դերում. նա ներկա է եղել այսօր ֆեդերացիայի ոչ պաշտոնական ժողովին, որի ժամանակ նախատեսվում էր ֆեդերացիայի նախագահի ընտրության հարցի քննարկում:
Միքայելյանին այդ ֆեդերացիայում միանշանակ չեն ընդունել, իսկ ֆեդերացիայի նախագահի ընտրության մասին խոսակցությունն էլ վերածվել է բանավեճի ժողովի մասնակիցների կողմից, թեժացել է այն աստիճան, որ ՔՊ-ական պատգամավորը ստիպված է եղել հեռանալ:
Արդյոք այս հեռացումը ժամանակավոր է, թե՞ Միքայլեյանն ամեն գնով ձեռք կգցի նաև այս ֆեդերացիայի նախագահի պաշտոնը, ավելի ուշ հայտնի կդառնա, իսկ մինչ այդ հիշեցնենք, որ ապրիլ ամսին նախատեսված է Երկրապահ կամավորականների միության նախագհի ընտրությունը, և Սասուն Միքայելյանը կդառնա այդ միության նախագահը:
Ինչպես այսօր վարչապետ Փաշինյանն ասաց՝ քաղաքական որոշումը կայացված է, հավանաբար, նման մի որոշում էլ կկայացվի Հայաստանի թաեքվոնդոյի ֆեդերացիայի նախագահի ընտրության հարցում:
Այդ պարագայում առնվազն տարօրինակ կլինի կառավարության ղեկավարի՝ կարևոր մարմինները ՔՊ-ականացնելու քայլարշավն այն համատեքստում, երբ ընտրություններից առաջ տրվում էին հրապարակավ խոստումներ, որ ՀՀԿ-ի ոճը չեն կրկնելու: Փաստորեն, ՔՊ-ականներն այս հարցում անգամ գերզանցում են ՀՀԿ-ականներին, նրանցն են դառնում ոչ միայն բուհերի հոգաբարձուների խորհուրդների նախագահների, ռեկտորների պաշտոններն, այլ նաև ֆեդերացիաներինը:
NEWSPRESS.am