Ողբերգական դեպք «Լոռի Բերդ» ամրոցի տարածքում. 15-ամյա պատանին կիրճից ընկել է գետն ու մահացել
Մարտի 22-ին, ժամը 16:19-ին 911 ծառայությանն ահազանգ է ստացվել, որ Լոռու մարզի Լոռի բերդ գյուղին հարակից ձորում երեխան (մոտ 15 տարեկան) ընկել է Ձորագետ գետը. անհրաժեշտ է փրկարարների օգնությունը:
Դեպքի վայր է մեկնել ԱԻՆ ՓԾ հրշեջ-փրկարարական ջոկատից մեկ մարտական հաշվարկ:
Պարզվել է, որ «Լոռի Բերդ» ամրոցի տարածքում Ա.Պ.-ն (ծնված 2002թ., Ստեփանավան քաղաքի բնակիչ) մոտ 30 մ բարձրությունից ժայռից ընկել է Ձորագետի կիրճը:
Ժամը 16:45-ին փրկարարները կիրճում անգիտակից վիճակում (կենդանության նշանները բացակայել են) հայտնաբերել են Ա.Պ.-ին:
Ժամը 17:15-ին շտապօգնության բժիշկը հաստատել է Ա.Պ.-ի մահը:
Նշենք, որ իր ֆեյսբուքյան էջում դեպքին արձագանքել է ԿԳ նախարար Արայիկ Հարությունյանը՝ հարազատներին ցավակցելով, իսկ ուսուցիչներին՝ կոչ անելով ավելի ուշադիր լինել էքսկուրսիաների ժամանակ:
«Քիչ առաջ տեղեկացա Ստեփանավանում ողբերգական դեպքի մասին: Էքսկուրսիայի ժամանակ Ստեփանավան քաղաքում` Լոռի Բերդում 150-200 մետր բարձրությունից կիրճն է գլորվել Ստեփանավանի միջնակարգ 6-րդ դպրոցի 10-րդ դասարանի աշակերտ 15-ամյա Ալեքսանդր Պեպանյանը: Զրուցեցի նաև տնօրենի հետ, ով մանրամասներ ներկայացրեց ողբերգական այս դեպքի վերաբերյալ: Խնդրեցի ցավակցությունս փոխանցել աշակերտի համադասարանցիներին, ուսուցիչներին և տղայի ծնողներին:
Հ.Գ. Շատ եմ խնդրում դասվարներին և ծնողական խորհուրդներին ուշադիր լինել աշակերտներին էքսկուրսիաների տանելիս»,-գրել է նա: