Փաշինյանն ու Ալիևը ի վերջո հանդիպելո՞ւ են, թե՞ ոչ
ՀՀ ԱԳ նախարարության խոսնակ Աննա Նաղդալյանի հայտարարությունը՝ Նիկոլ Փաշինյան-Իլհամ Ալիև առաջիկա հնարավոր հանդիպման մասին, մեղմ ասած, բավական լուրջ տարակուսանքների առիթ կարող է տալ։ Հիշեցնենք, որ տիկին Նաղդալյանը, անդրադառնալով այն հարցին, թե կլինի՞ արդյոք Փաշինյան-Ալիև հանդիպումը, մասնավորապես, ասել է հետևյալը․
«Դեռ այն փուլը չէ, երբ մենք կարող ենք համաձայնեցված հայտարարել Փաշինյան-Ալիև հանդիպման մասին»։
ԱԳ նախարարության խոսնակն արձանագրել է, որ կան սկզբունքներ, որոնց հավատարիմ է մնում Հայաստանը, դեռ չի եկել այն փուլը, երբ կարելի է հայտարարել Հայաստանի ու Ադրբեջանի առաջնորդներ Նիկոլ Փաշինյանի ու Իլհամ Ալիևի հանդիպման մասին։
«Մենք երբեք չենք խախտել այդ սկզբունքը։ Երբ հանդիպման մասին պայմանավորվածություն լինի, մենք կհայտարարենք դրա մասին։ Այս դեպքը բացառություն չէ»։
Միաժամանակ, ԱԳՆ խոսնակը նաև հավելել է, որ Հայաստանի ԱԳՆ-ն կապի մեջ է ԵԱՀԿ Մինսկի խմբի համանախագահների հետ և ընդունում է հակամարտության խաղաղ կարգավորման վերաբերյալ բոլոր ջանքերը։ Ի՞նչ կարող է նշանակել այս՝ բավական տարօրինակ և անհասկանալի հայտարարությունը։ Արդյո՞ք այս հայտարարությունից կարող ենք հասկանալ, որ Փաշինյան-Ալիև հնարավոր հանդիպման հետ կապված նախապատրաստական աշխատանքներում ի հայտ են եկել խնդիրներ, երբ անհրաժեշտություն է առաջացել լրացուցիչ համաձայնեցումների, որոնք դեռ չկան, կամ ամբողջական չեն, ինչի պատճառով էլ Երևանը նման հայտարարություն է անում։
Կամ, գուցե առհասարակ հանդիպո՞ւմն է հետաձգվել կամ վերափոխվել, և հիմա համանախագահները ԱԳ նախարարությունների հետ այս ուղղությամբ են աշխատում և համաձայնեցնում։ Պարզ է միայն, որ հանդիպման անհրաժեշտություն կա։ Գոնե դա կարելի էր հասկանալ նաև Նիկոլ Փաշինյանի վերջին շրջանի հայտարարություններից, որոնք հնչեցվել են ստեփանակերտյան ԱԽ նիստից սկսած, քանի որ կա հստակեցման կարիք ձևակերպումների հետ կապված, քանի որ նույն ձևակերպումները տարբեր կերպ են մեկնաբանվում մայրաքաղաքից մայրաքաղաք։
Իհարկե, պետք է հաշվի առնել ևս մեկ նրբություն։ Դեռ ամիսներ առաջ ՌԴ ԱԳ նախարար Սերգեյ Լավրովը ադրբեջանական մեդիային տված իր հարցազրույցներից մեկում ակնարկել էր, որ հանդիպում լինելու է և լինելու է եռակողմ՝ հասկացնելով, որ հանդիպումը Պուտին-Փաշինյան-Ալիև ֆորմատով է լինելու, ինչը նշանակում էր, որ կարգավորման ողջ գործընթացը Մոսկվան վերցնում է իր պատրոնաժի տակ։ Ու հնարավոր է, որ հիմա այս ուղղությամբ են սկսել աշխատանքներ տարվել, կամ այս ուղղությամբ աշխատանքներում են սկսել բարդություններ ի հայտ գալ, հաշվի առնելով, որ ռուս-ամերիկյան առճակատման սերմերը նաև Ղարաբաղյան կարգավորման գործընթաց են սկսել թափանցել։
NEWSPRESS.am