Տաջիկ բամբակագործներն աշխատավարձ են պահանջում հայ գործարար Գագիկ Խաչիկյանից (ֆոտո, վիդեո)
Տաջիկստանից բամբակի մշակման նպատակով Հայաստան եկած քաղաքացիները կառավարության դիմաց բողոքի ակցիա էին կազմակերպել: Արմավիրի մարզի բամբակի մշակման ու վերամշակման ձեռնարկությունում աշխատող Տաջիկստանի քաղաքացիները պատմում են, որ Հայաստան են եկել 2018 թվականի մայիսին, աշխատել ու նորմալ աշխատավարձ են ստացել, իսկ վերջին 3 ամսվա համար նրանց չեն վարձատրում: Իրենց հասանելիք գումարն ստանալու ակնկալիքով Տաջիկստանի քաղաքացիները բողոքի ակցիա անելու նպատակով արդեն երկրորդ անգամ են կառավարության դիմաց ակցիա կազմակերպում:
«Մենք 10-ն էինք: Մեզնից հինգը հույսը կտրելով, որ աշխատածի դիմաց գումար կստանա՝ գնաց, հիմա 5-ով եկել ենք, որ մեր գումարներն ստանանք, բայց ոչ ոք չի լսում մեր խնդիրը: Մեր երեխաները սոված մեզ են սպասում»,- NEWSPRESS.am-ի հետ զրույցում ասաց տաջիկ բամբագործներից Աբդուլո Խայրուլոնը, ով համեմատաբար ավելի լավ էր տիրապետում ռուսերենին ու կարող էր ներկայացնել խնդիրը:
Նա նկատեց, որ եթե հիմա որևէ մեկը կառավարությունից դուրս գա և ասի վաղը, կամ մյուս օրը կտան գումարը, չեն հավատա, քանի որ նման խոստումներ էլի են եղել:
Աբդուլո Խայրուլոնը նկատում է, որ իրենց խաբել է «Բամբակ տեքստիլ գրուպ» ՍՊԸ հիմնադիր Գագիկ Խաչիկյանը: «Մեզ ասում են՝ լավ չեն աշխատել, դրա համար փող չենք տալիս, բայց, կներեք, եթե լավ չէինք աշխատում, ավելի շուտ այդ մասին ասեիք, ինչո՞ւ էիք այսքան երկար պահում ու հիմա ասում, թե լավ չենք աշխատել: Մեր աշխատանքի մասին նույնիսկ ֆիլմ են նկարահանել, ու Խաչիկյանն էլ գոհ է եղել մեզնից»,- ասաց բամբակագործը:
Աբդուլովի խոսքով` ընդհանուր առմամբ, Խաչիկյանն իրենց պարտք է 15 հազար դոլար: