Սերժի «վախտով» ոստիկանի կիրառած բռնությունը բռնություն էր, Նիկոլի «վախտով»՝ օրհնանք
Օպերայի հարակից սրճարանների ապամոնտաժման աշխատանքները շարունակվում են։ Կա շրջանառության մեջ դրված լուր, որ հաջորդը Օղակաձեւ այգին է լինելու։ Մի կողմից հասկանալի է, որ ավելի քան մեկ միլիոն բնակիչ ունեցող քաղաքում, որտեղ բավական մեծ թիվ են կազմում ավտոմեքենաները, կանաչ տարածքի խնդիր կա, հատկապես կենտրոնում, թեև ծայրամասերն էլ մի լավ վիճակում չեն։ Մյուս կողմից` կա խնդիր բնակչության սոցիալական վիճակի տնտեսական ծանր դրության հետ կապված։
Այսինքն` եթե հանում ենք սրճարանները, ի՞նչ ենք առաջարկում դրա փոխարեն։ Կամ ի՞նչ ենք փոխհատուցում։ Օրինականության հետ խնդիրներով բոլոր սրճարանները չէ, որ աշխատել են։ Իսկ նրանք, որոնք աշխատել են բացառապես օրինական կերպով, ի՞նչ է լինելու նրանց հետ։ Սրանք հարցեր են, որոնք անմիջականորեն պետության, կոնկրետ՝ ներկայիս իշխանության արձագանքին են սպասում։ Կլինի, թե ոչ այդ արձագանքը, դժվար է ասել։ Ավելի հավանական է, որ չլինի։
Սակայն գոնե մեկօրյա ակցիաների տպավորությունը, կարելի է ասել, ամբողջովին մերկացրեց Նիկոլ Փաշինյանին, ցույց տվեց, թե իրականում ինչ է ներկայացնում թավշիստների իշխանությունը։ Ցույց տվեց, որ եթե, օրինակ, Հայաստանը ելք ունենար ծով, կամ էլ քիչ թե շատ ռեսուրսապահովված երկիր լիներ կամ գտնվեր փոքրիշատե տանելի ռեգիոնալ և աշխարհաքաղաքական իրավիճակում, Փաշինյանը մեծագույն սիրով կգնար դիկտատուրայի, կհռչակեր «Նիկոլական չուչխեի» ուսմունքը, իրեն կհայտարարեր «զոմբիների ֆյուրեր» և այսպես շարունակ։ Այսինքն՝ պարզ երևաց, որ այս իշխանությունը, թեև իշխանության է եկել նաև դեմոկրատիայի արժեքների չարաշահումով, պատրաստ չէ և երբեք էլ պատրաստ չի լինելու այդ արժեքները հարգել։
Կարելի է, օրինակ, պատկերացնել, թե ինչ մեգահերց ուժգնությամբ Փաշինյանը կճղճղար եթե այս ամենը լիներ Սերժ Սարգսյանի օրոք։ Այլ խոսքով ասած՝ Սերժի «վախտով» ոստիկանի կիրառած բռնությունը բռնություն էր, Նիկոլի «վախտով» ոստիկանի կիրառած բռնությունը առնվազն գլուխշոյանք է ու օրհնանք։
Գուցե և իշխանություններին հաջողվի Օպերան իրենց բառերով ասած ազատագրել, նաև անցնել Օղակաձև այգուն ու էլի տարածքների։ Սակայն որևէ ողջամիտ քաղաքացի, ով գոնե ունի քիչ թե շատ գումար, այս ամենից հետո հասկանում է՝ ոչ մի դրամ Նիկոլական Հայաստանի տնտեսության մեջ, և եղած փողն էլ որքան հնարավոր է արագ դարձնել արտարժույթ և հանել երկրից։