Առաջին տիկին լինելն այդպես էլ չի ստացվում
Ռուսաստանի Դաշնության նախագահ Վլադիմիր Պուտինը Կանանց միջազգային օրվա կապակցությամբ առաջինը շնորհավորել է Հայաստանի Հանրապետության նախագահի տիկին Նունե Սարգսյանին:
Պուտինը տիկին Նունեին մաղթել է քաջառողջություն և ամենայն բարիք:
«Ի սրտե մաղթում եմ, որ այս նշանակալի տոնը ջերմացնի Ձեզ գարնան ջերմությամբ, մտերիմների ու ընկերների ուշադրությամբ և հոգատարությամբ: Թող կյանքում Ձեզ ուղեկցի հաջողությունը, իսկ Ձեր տանը տիրի ներդաշնակության ու սիրո մթնոլորտ:
Քաջառողջություն և ամենայն բարիք Ձեզ»,-մեր նախագահի կնոջը մաղթել է Պուտինը՝ փաստելով, որ չնայած Աննա Հակոբյանի ջանքերին՝ նա այդպես էլ չի ընկալվում որպես առաջին տիկին և չի արժանանում առաջինը շնորհավորանք ընդունելու պատվին:
Այո՛, Աննա Հակոբյանը կարող է ամուսնու հետ մեկնել Շվեյցարիա, Բելգիա, Բրյուսել, սակայն միևնույնն է՝ ՀՀ առաջին տիկինը եղել է և մնում է Նունե Սարգսյանը, ինչի հետ ոչ մի կերպ չի կարողանում հաշտվել տիկին Աննան։
Այդ անհաշտ մրցավազքի արդյունքում Աննան երբեմն-երբեմն ունենում է հիստերիայի նոպաներ, ինչպիսին ունեցավ Բրյուսել կատարած այցի ընթացքում և հետո: Արհամարհանք ու հեգնանք․ ահա սա է բերել տիկին Աննան Բրյուսելից՝ աջ ու ձախ հրապարակ նետելով հարցեր ու պատասխաններ, որոնք ավելի ու ավելի են ընդգծում «Չտեսավ պատից կախ, տեսավ ճակտից կախ» հայտնի ժողովրդական իմաստնության արդիականությունը։
Նշենք, որ ՀՀ առաջին տիկնոջը շնորհավորել է նաև Ռուսաստանի Դաշնության վարչապետ Դմիտրի Մեդվեդևը: Իհարկե, ավելի ուշ Պուտինն ու Մեդվեդևը շնորհավորեցին նաև տիկին Աննային, բայց նա, փաստորեն, երկրորդն էր: Այս հերթականությունը՝ թելադրված գերտերության ղեկավարների կողմից, կարծես թե իրերը ևս մեկ անգամ իր տեղն է դնում՝ տալով դրանց իրական անունները: Փաստորեն, Պուտինն ու Մեդվեդևը Աննային հասկացրեցին՝ հանգիստ նստել տեղն ու բավարարվել երկրորդ հորիզոնականով: Իսկ դա, ինչպես տեսնում ենք իրար հաջորդող զարգացումներից, այնքան էլ Աննա Հակոբյանի սրտով չէ. նա պատրաստ է անգամ մոռանանալ անցած ուղին ու գործընկերներից՝ նրանցից մի գլուխ բարձր երևալու և այդ մասին գոռալու համար: Հուսանք՝ առաջին տիկնոջ համար մրցավազքն էլ ավելի չի ծանրացնի տիկին Աննայի՝ առանց այն էլ լարված նյարդերը, և նա ստիպված չի լինի մեկ-երկու կսմթոց ավել հասցնել իրեն այս օրերին շատ ակտիվ քննադատող իր նախկին գործընկերներին։