Մխիթարի ինքնահաստատման դուխով ցերեկույթը ոչինչ չտվեց՝ ամոթից բացի
7-րդ գումարման Ազգային ժողովի այսօրվա նիստը լարված անցավ․ այդ լարվածության առանցքում կրկին իշխանական և ընդդիմադիր պատգամավորներն էին։
Խոսքն այս պարագայում վերաբերում է ԱԺ «Լուսավոր Հայաստան» խմբակցության պատգամավոր Գևորգ Գորգիսյանի և «Բարգավաճ Հաայստան» խմբակցության պատգամավոր Նաիրա Զոհրաբյանի կողմից խորհրդարանում հնչած ելույթների՝ իմքայլականների ընկալմանը։
Գորգիսյանն իրավացիորեն դժգոհեց, որ ԱԺ նիստերի օրակարգ չընդգրվեց իր խմբակցության ներկայացրած օրեսդրական նախաձեռնությունը, որով առաջարկվում է նախնական կալանքի ենթարկված անձանց պահման մեկ օրը հաշվարկել 1,5 օր։
Իմքայլականներն այս նախագիծն օրակարգ չներառեցին՝ բերելով դրա համար իրենց հիմնավորումները, որոնք, սակայն, ոչ այլ ինչ էին, եթե ոչ նախորդ իշխող մեծամասնության քայլերի կրկնություն։
Ընդդիմադիր ուժի ներկայացրած նախագիծն օրակարգ չընդգրկելու՝ իշխանության այս քայլը նախկինի քայլերի կրկնություն որակեց նաև ԲՀԿ-ական Նաիրա Զոհրաբյանը։
Նա իշխող ուժի 88 պատգամավորներին հորդորեց նախորդի սխալների հետքերով չգնալ և չանել բաներ, ինչի համար իրենք էին քննադատում ժամանակին իշխանությանը։
Հավանաբար, Մխիթար Հայրապետյանին, ինչպես իր թիմակից մյուս քայլող պատգամավորներին, խիստ դուր չեկան հնչած ելույթները, ուստի՝ նա մոտեցավ ամբիոնին և սկսեց հաթաթա տալ պատգամավորներին, զգուշացնել՝ դեմագոգիկ հայտարարություններ պատգամավորները կարող են անել, բայց ոչ իր հետ հարաբերվելիս։
Հայրապետյանը կոչով դիմեց ԼՀԿ-ական պատգամավորին՝ մի քանի անգամ կրկնելով նախկին ոստիկանապետ Վովա Գասպարյանին հեղինակային իրավունքով պատկանող հայտնի բառը։
«Սթափվեք»,-ԱԺ ամբիոնից հորդորեց Հայրապետյանն՝ այս ելույթի ընթացքում գրեթե ունենալով հուզական պոռթկումներ։
Նախկին նախարարը, (հիշեցնենք, որ նրա նախարար աշխատելուց հետո ինքը՝ նախարարությունը փակվեց), արձագանքեց նաև ընդդիմադիր մեկ այլ պատգամավորի՝ Նաիրա Զոհրաբյանի ելույթին, ով քաղաքական օրվա մեծամասնությանը նմանեցրեց հեղափոխությունից առաջ գոյություն ունեցող քաղաքական մեծամասնությանը։
«Արդեն որերորդ անգամ փորձ է արվում մեր քաղաքական մեծամասնության գործընկերներին ներկայացնել որպես սեփական կարծիք չունեցողներ։ Խնդրում եմ ընդհանրապես կասկածի տակ չդնել մեր քաղաքական անկախությունը, կամքը, սեփական կարծիքն ու պատկերացումները՝ անընդհատ դրանք կապելով կառավարության տեսակետների հետ»,-իրենց քաղաքական անկախության մասին բարձրաձայնեց Մխիթար Հայրապետյանը։
Հայրապետյանն իր այս պահվածքի և հարցեր լուծելու տղայական մեթոդների իմացությամբ խորհրդարանում այսօր փայլեց, արժանացավ մի քանի կայքերում հայտնվելու բախտին, գուցե վաղն էլ նրա մասին թերթերը գրեն, բայց ի՞նչ ստացավ այն քաղաքացին, ով հավատալով թավշիստների խոստումներին, իր քվեն տվեց այս ուժին՝ նրանց փողոցից հասցնելով խորհրդարան՝ ազգի առաջ ծառացած խնդիրներին լուծումներ տալու և ոչ թե բազարներ անելու համար։
Շարքային ՀՀ քաղաքացուն, որն այլևս հպարտ չէ, Մխիթար Հայրապետյանի ինքնահաստատման այս ցերեկույթը ոչինչ չտվեց՝ ամոթից բացի։