«Ռուբենն իրենց համար առիթ էր՝ իմ դեմ դուրս գալու համար». Համլետ Ղուշչյան
«Զարմանալի ոչինչ չկա, որ ծախու գրչակները հարձակվել են, քանի որ այսօր հայկական մեդիայի մեծ մասը քոչարյանական և սերժական կլանի ձեռքին է»: Այս մասին NEWSPRESS.am-ի հետ զրույցում ասաց սպորտային նախկին մեկնաբան, լրագրող, հաղորդավար Համլետ Ղուշչյան, անդրադառնալով իր «Բաց օր» հաղորդման շրջանակում երգահան Ռուբեն Հախվերդյանի հետ հարցազրույցին:
Նրա դիտարկմամբ՝ այդ աղմուկն ավելի շատ իրեն է ուղղված. օգտագործելով Ռուբեն Հախվերդյանի խոսքն արցախցիների մասին, նպատակ է եղել հարվածել հենց իրեն ու իր հաղորդաշարին:
«Ռուբենն իրենց համար առիթ էր, նա միշտ էլ իրենց ասել է, թե իրենք ով են, հասկանո՞ւմ եք: Բայց ես ավելի շատ զարմացած եմ այն մտավորականների վրա, ովքեր իենց թույլ են տվել ոչ պարկեշտ արտահայտություններ անել: Իմ գործընկերնեից էլ ոմանք, ում ես մոտ 30 տարի ճանաչում եմ, այսօր պարզվում է՝ այնքան էլ այն մարդիկ չեն, ինչպես ես պատկերացնում էի: Այսինքն՝ սովորական դավաճաններ, ովքեր այսօր էլ դեռ փորձում են միավորներ շահել»,-ասում է Համլետ Ղուշչյանն ու նկատում, որ դա իր համար ցավալի է:
Նրա գնահատմամբ՝ իրենք սովորական լրատվամիջոց են, և հնարավորություն են տալիս ազատ արտահայտվել բոլորին: Ու Ռուբեն Հախվերդյանն էլ բացառություն չէր: Ի սկզբանե Համլետ Ղուշչյանը նրան հրավիրել է որպես երգահանի՝ գարնան հետ կապված հարցազրույցի համար, սակայն Հախվերդյանը, Ղուշչյանի խոսքով, իր սովորության համաձայն չէր կարող չանդրադառնալ Մարտի 1-ին:
Ամեն դեպքում, Համլետ Ղուշչյան ևս մեկ անգամ վստահեցնում է՝ Ռուբեն Հախվերդյանի հայտարարությունն առիթ էր՝ իր դեմ դուրս գալու համար:
«Ես 20 տարի դրանց հետ կռիվ եմ տվել: 3 անգամ ստիպված եմ եղել երկրից գնալ, բաց տեքստով ասել են, որ եթե չգնամ՝ կսպանեն... ինչերի՜ միջով եմ անցել»,-ասում է Համլետ Ղուշչյան՝ պարզաբանելով, որ հենց դա է հիմք հանդիսանում իր համար ասելու, որ այս ամենն ավելի շատ ուղղված էր հենց իր դեմ: