Պարո՛ն Մարության, Ձեզ սպառնո՞ւմ են․․․ Դուք պետք է արթնանաք և քնեք աղբի նկարներով․ Անի Սամսոնյանի կոշտ ելույթը (տեսանյութ)
Եկել եմ՝ մի քիչ շեղեմ ձեզ, ձեր տոնածառի հանդեսից, պարո՛ն Մարության:
Այսպես սկսեց Երևանի ավագանու նիստի ժամանակ իր ելույթը «Լույս» խմբակցության անդամ Անի Սամսոնյանը:
Նա նկատեց, որ 3 ամսվա ակնկալիքները շատ ավելի մեծ են եղել քաղաքապետի աշխատանքից, քան իրականությունն է․ ծագել են մի շարք սկզբունքային հարցեր, որոնց քաղաքապետն այդպես էլ լուծում չի տվել։
«Ես գիտեմ, որ Դուք կախարդական փայտիկ չունեիք, որ միանգամից լուծեիք այդ հարցերը, բայց այս ընթացքում եղան հարցեր, որոնք կարող էին Ձեր կողմից լուծում ստանային և չստացան»,-ասաց նա։
Անի Սամսոնյանը հիշեցրեց,որ այս ընթացքում քաղաքապետին է գրել երկու նամակ, որոնց պատասխանները բավարար չեն եղել։
«Ավելի լավ էր՝ չպատասխանեիք, պարո՛ն քաղաքապետ, գրեիք, որ չեք պատասխանում»։
Առաջին նամակով նա խնդրել էր համատեղ հանդիպում կազմակերպել կրթության և գիտության նախարարի, իր և այն ուսուցիչների միջև, որոնք անարդարացիորեն նվաստացվել և վիրավորվել են քաղաքապետարանի հանրակրթության վարչության պետից:
«Այս հարցի վերաբերյալ խայտառակ եղան հանրակրթության վարչության պետ Աննա Ստեփանյանը, կրթության փոխնախարարը, խայտառակ եղաք նաև Դուք, պարո՛ն Մարության, որովհետև ես այստեղ ելույթ ունեցա, հարց բարձրացրի, որ Դուք պետք է հեռացնեք այդ անէթիկա պաշտոնյային, բայց նա մինչև հիմա չի հեռացվել: Եվ իմ բերած փաստերին ոչ մի հակափաստարկ չի բերվել: Ինչո՞ւ չեք հեռացնում Աննա Ստեփանյանին»,- հարցրեց Անի Սամսոնյանը, և հավելեց․ «Ասում են՝ քաղաքապետն 80 % ձայն է ստացել, ասում էր՝ դեմը խաղը չկա, բա ինչի՞ չի լուծում էդ հարցը։ Դե ասեք, պարոն քաղաքապետ, ինչո՞ւ չեք լուծում այդ հարցը․ պարոն քաղաքապետի հայտարարություններն ու գործն իրար չեն բռնում»,-ասաց Անի Սամսոնյանը։
Նա նաև աղբահանության հարցը բարձրացրեց։ Անի Սամսոնյանյանը նկատեց, որ «Իմ քայլը» դաշինքի նախընտրական ծրագրում տեղ էր գտել աղբահանության երկրորդ օպերատորին ներգրավելու կետը:
«Դուք իսկապե՞ս կարծում էիք, որ երկրորդ օպերատոր պետք է ունենայիք, ես անցյալով եմ տալիս այդ հարցը, քանի որ արդեն կասկածում եմ․․․ Ես այն եզրահանգմանն եմ գալիս, որ, պարո՛ն քաղաքապետ, Դուք չգիտեք՝ ինչպես լուծել այդ խնդիրը և անկարող եք քաղաքը մաքրել աղբից: Միգուցե Ձեզ սպառնում են, շանտաժ են անում, կիսվեք մեզ հետ, միգուցե մենք օգնե՞նք Ձեզ»,-ասաց Անի Սամսոնյանը։
Նա կոչ արեց բոլոր քաղաքացիներին ֆլեշմոբ անել:
«Ձեր անձնական էջին, գործնական էջին ամեն առավոտ, ամեն երեկո թող ուղարկեն աղբի նկարներ: Դուք պետք է արթնանաք և քնեք աղբի նկարներով»,- ասաց Անի Սամսոնյանը:
Նա անդրադարձավ նաև տոնածառի հարցին։
«Իսկապես տոնածառը շռայլություն է մեզ համար․ ինչպես ասում եք՝ հանրության պահանջն էր դա, հազիվ դեմը առաք, որ հանկարծ փողոց չփակեն․․․»։
Մանրամասները՝ տեսանյութում