Դատական համակարգի որակյալ կազմը հանենք, ո՞ւմ բերենք, գնանք դեպի անորոշությո՞ւն․ Գևորգ Պետրոսյան
Հանուն ճշմարտության՝ պետք է ասենք, որ այսօր շատերն ասում, բայց չեն հասկանում անցումային արդարատատությունն ինչ է։ Այդ մասին հայտարարեց «Ծառուկյան» դաշինք խմբակցության պատգամավոր Գևորգ Պետրոսյանն ԱԺ-ում Սահմանադրական դատարանի դատավորի թափուր տեղի համար՝ Հայաստանի նախագահ Արմեն Սարգսյանի կողմից առաջադրված Վահե Գրիգորյանի թեկնածության քննարկման ժամանակ։
Պատգամավորը դիմեց Վահե Գրիգորյանին՝ խնդրելով մեկնաբանել, թե ինչ նկատի ունեն՝ անցումային արդարադատություն ասելով։ Գևորգ Պետրոսյանի խոսքով՝ հասարակությունն ու նաև դատական համակարգը պետք է հասկանա, թե ինչ է նախապատրաստում իշխանությունն իր համար։
«Հաշվի առնելով, որ ՀՀ-ում արդարադատությունն իրականացնում են միայն դատարանները, հանրությունն ուզում է իմանալ, թե ինչ է այդ անցումային արդարադատությունը՝ արտակարգ դատարանների ստեղծո՞ւմ, քանի որ դա մասնագիտացված դատարան չէ, թե՞ դուք այդ հատվածն ընդգրկել եք վերջին շրջանում տեղի ունեցող իրավիճակին համահունչ լինելու համար, թե՞ իսկապես գտնում եք, որ Հայաստանում կա այնպիսի վիճակ, որ անցումային արդարատադությունն անխուսափելի է»,- ասաց Գևորգ Պետրոսյանը։
Նա նկատեց, որ, իհարկե, ՀՀ-ի դատական համակարգը վերանայվելու անհրաժեշտություն ունի, սակայն Պետրոսյանը չի կարծում, որ այն ամբողջությամբ պարալիզվացված է, որպեսզի դիմեն նման ծայրահեղ քայլի։
«Ես երբեք առիթը բաց չեմ թողել բախտախնդիր, օրինախնդիր և օրինախախտ դատավորների մասին այս ամբիոնից բարձրաձայնել, բայց չեմ կարող կիսել այն կարծիքը, թե ամբողջությամբ պարալիզված է դատական համակարգը։ Եկեք հարգենք մեր արդարադատության դատավորներին, կրկնում եմ՝ առանձին մարդկանց մասին չէ խոսքը, եկեք հարգենք համակարգի այն նվիրյալ աշխատողներին, ովքեր ոչ համարժեք աշխատավարձի դիմաց առավոտից երեկո աշխատում են՝ վճիռներ կայացնելով։ Հիմա ի՞նչ անենք, էս դատավորներին դո՞ւրս անենք դատական համակարգից․ էլ չեմ ասում, որ գործազրկության մակարդակը կավելանա, էդ որակյալ կազմը հանենք, ո՞ւմ բերենք․․․ չեմ կարծում, որ կա այլ ուղի»,- նկատեց պատգամավորը՝ հավելելով, որ սա կարող տանել անորոշության ու իրավական դաշտում խնդիրներ առաջացնել։
Նա խնդրեց Վահե Գրիգորյանին անդրադառնալ խնդրին։