Խորհրդարանի ներկան և ապագան՝ ըստ Նարե Գրիգորյանի
Կառավարության աշխատակազմի նախկին աշխատակից Նարե Գրիգորյանը, ով Վարչապետի աշխատակազմի գործերի կառավարիչ Վահան Պապիկյանի հետ կոնֆլիկտի պատճառով զրկվել էր աշխատանքից, ֆեյսբուքյան իր էջում գրել է.
«Երբ ամբոխը փրփուրը բերանին հարձակվում է պառլամենտի պատգամավորների վրա և ստիպում քաղաքական որոշումներ կայացնել՝ կարող ենք միանշանակ պնդել, որ երկրում դադարել են գործել Սահմանադրությունն ու օրենքները: Lրագրողներին ասվում է՝ չէ, ինչ ճնշում, մենք ոչ մեկին չենք ճնշել, պատգամավորներին ճնշել են իրենց իսկ ընտանիքի անդամները: Այդ խոսքերի մեջ թվացյալ ժողովրդավարություն և իրական սպառնալիք կա: Մարդու ընտանիքը մասերի բաժանելը և միմյանց դեմ հանելը այսօր համարվում է ժողովրդավարություն և կամ հպարտության առիթ է հանդիսանում: Իրականում ընտանիքի անդամների միջոցով մարդուն ճնշելը ավելի մեծ ստորություն է, քան այդ նույն մարդուն, ասենք, ԿԳԲ-ի պադվալներում տանջելը՝ մինչև ցանկալի արդյունքի հասնելը:
Ասել եմ և կրկնում եմ՝ հանրության տարբեր շերտերի միջև ատելության բորոբոքումը ոչմի լավ բանի չի հանգեցնելու, և կործանարար է լինելու առաջին հերթին այն բորբոքողների համար:
Երկրում կա շատ մեծ ատելություն և շատ մեծ անհանդուրժողականություն:
Որևէ հարցի վերաբերյալ բողոքելն ընդունվում է սվիններով:
Որդեկորույս մայրը բողոքում է իր որդու սպանության գործով՝ նրան անվանում են լիրբ:
Ես բողոքեցի աշխատանքից ազատվելու համար՝ ինձ ավելի վատ բառերով անպատվեցին:
Բայց չշեղվենք թեմայից: Խորհրդարանը բռնի լուծարելուց հետո չափազանց տխուր վիճակ է մեզ սպասվում: Ուղեղը լվացված ամբոխը առանց երկար-բարակ մտածելու գնալու է ընտրելու է մեկ կուսակցության, ում դասել է փրկիչների և կուռքերի շարքը:
Դրանից հետո, 70-80 տոկոս ձայն ստանալու արդյունքում, պառլամենտ են մտնելու երիտասարդ, կիսով չափ սափրված /կամ կիսով չափ չսափրված/, պետական աշխատանքից հեռու, նեղ տաբատներով, դուխը լկտիության հետ շփոթած մարդիկ: Եվ խորհրդարանի աշխատանքները վերածվելու են շիլա-փլավի, ինչպես որ վերածվել է կառավարության աշխատանքը: Ներքին կազմակերպչական գործերը առկախվելու են օդում, որ թուղթը ով և ինչպես պիտի ստորագրի՝ չեն իմանալու: Իրար վրա են բարդելու, ժամերն անցնելու են՝ գործը մնալու է, իրենց աշխատողներից պահանջելու են արտաժամյա աշխատանք, սրանք էլ եթե հրաժարվեն՝ կոնֆլիկտներ են սկսվելու: Իսկ եթե որևէ մեկը բողոքի ստեղծված վիճակի համար՝ ավտոմատ հռչակվելու է ազգի թշնամի:
Տխուր օրեր են սպասվում հայոց աշխարհին: Գալու է մի պահ, որ այդ նույն միտինգավորները ընկնելու են սարեսար ու քարեքար և Աշոտյանին ու Շարմազանովին փնտրեն՝ վերադառնալու խնդրանքով: Անգամ ներողություն են խնդրելու:
Ես նրանց տեղը լինեմ՝ չեմ ների»: