40 հազար հեկտարդ հասկացանք, բա ԽԾԲ-ով գործի ընդունելը ո՞րն է (տեսանյութ)
Վարչապետ Նիկոլ Փաշինյանի անգործունյա և ապաշնորհ թիմի մասին բազմիցս խոսել ենք: Դրան անդրադառնալու կարիք չէր լինի, եթե մեկը մեկի հետևից չապացուցեն իրենց տգիտության բարձր մակարդակն ու բանից անտեղյակ լինելը:
Վրիպակներ, ինչ խոսք, յուրաքանչյուրս կարող ենք թույլ տալ: Կա որոշակի հավանականություն, որ, օրինակ, ընդհանուր ժողովների, վերադասի հետ հանդիպման ժամանակ կամ այլ պատասխանատու միջոցառումներին պատահի այնպես, որ լարվածության մակարդակն այնքան բարձր լինի, որից խոսքն ու միտքը տուժեն: Այդ կոնտեքստում կարող ենք նաև տեղավորել Արարատի մարզպետ Գարիկ Սարգսյանի՝ 40 հազար հեկտարի մասին չհաջողված պատմությունը:
Բայց երբ հերթը հասնում է ոչ թե վրիպակներին, այլ կոնկրետ մտածված քայլերին, այն է՝ ծանոթ-բարեկամներին աշխատանքի ընդունելուն, հարցն ավելի ցավոտ է դառնում: Բանն այն է, որ մենք նախկինում ունեինք իշխանություններ, ովքեր առաջնորդվում էին ԽԾԲ սկզբունքով, սակայն հեղափոխության տրամաբանությունը նաև այն է, որ մենք արդեն պետք է զերծ մնանք նման երևույթից: Սակայն, ինչպես երևում է, դերը նույնն է՝ դերակատարներն են փոխվել:
Սրա՞ համար էր հեղափոխությունը, պե՞տք է կրկնվեին նախորդի արատավոր սովորույթները. կարծում ենք՝ ոչ: Հետևաբար, պետք է քննության առնվեն Արարատի մարզպետ Գարիկ Սարգսյանի կառավարման սկզբունքները, և այն հրապարակումները, որոնցում նշվում է՝ մարզպետի օգնականը նրա զարմիկն է՝ Գևորգ Մանուկյանը, աշխատակազմի ղեկավարի գործառույթները կատարողը՝ խորհրդականի հաստիքով գրանցված Լիլիթ Միրզախանյանը, մորաքրոջ հարսն է, մեկ այլ հեռավոր բարեկամ-ընկեր՝ Հովտաշենի գյուղապետ Արթուր Մկրտչյանն էլ տեղակալ է նշանակվել։