Սկավառակները կապարակնքեցին և «Երևան Սիթի»-ի տոպրակներով տարան․ Yerevan today-ի աշխատանքը պարալիզացվել է
Yerevan today կայքի խմբագրության աշխատակիցներին զրկել են աշխատելու հնարավորությունից։ Այդ մասին լրագրողների հետ զրույցում ասաց կայքի գլխավոր խմբագիր Սևակ Հակոբյանը։
Նա նշեց, որ կատարված խուզարկության արդյունքում ոստիկաններն առգրավվել են համակարգիչների 4-5 կոշտ սկավառակներ։
«Ստուգել են ամեն ինչ, նույնիսկ ինձ թվում էր, որ 2014 թվականից մեր գրած լրատվությանը ծանոթ են, որովհետեւ կարդացել են, լավ ինֆորմացված են՝ ինչ ենք գրել այդ ընթացքում։ Եկել էին 9 հոգով, բայց 9 հոգով գալը չի նշանակում, որ մենակ էին, որովհետև զանգում էին, խորհրդակցում էին, անընդհատ ինչ-որ բաներ էին խոսում և ինչ-որ մեծ համակարգ էր աշխատում, հիմա թե ինչի համար էր այդ համակարգն այստեղ ուղղորդվել, ես դժվարանում եմ ասել, մենք կհասկանաք՝ ինչ է կատարվում և հանդես կգանք ասուլիսով»,- ասաց Սևակ Հակոբյանը։
Նա հավելեց, որ ոստիկանության գործողությունները կատարվել են կոպիտ խախտումներով, նույնիսկ իրենց փաստաբաններին են դժվարությամբ ներս թողել: Սևակ Հակոբյանի խոսքով՝ այժմ աշխատանքը պարալիզացված է, քանի որ սկավառակներ են տարել։ Թեև ոստիկանները նկատել են, որ այն, ինչ փնտրում էին, չկա, բայց սկավառակները տարել են իրենց հետ։
«Նրանք այդ ամենը կապարակնքեցին և «Երևան Սիթի»-ի տոպրակներով տարան»,–հավելեց նա։
Սևակ Հակոբյանը հերքեց ՀՀ երկրորդ նախագահ Ռոբերտ Քոչարյանի կապն իրենց կայքի հետ և ասաց, որ կայքը երկրորդ նախագահին չի պատկանում. «Ռոբերտ Քոչարյանը կապ չունի կայքի հետ, կայքի սեփականատիրոջ մասին ինֆորմացիան կարող ենք նայել, մնացածը, թե ինչ են ասում, ինչ են գրում, արդեն երկրորդական բան է։ Yerevan today կայքի սեփականատերը Ռոբերտ Քոչարյանը չէ, ոչ էլ կապ ունի կայքի հետ»։