Սփյուռքի նախարարությունում սկսել է լույս վառվել
Սփյուռքի նախարար Մխիթար Հայրապետյանը ֆեյսբուքյան իր էջում գրառում է կատարել՝ վերլուծելով նախարարության կողմից ծախսված գումարները` լրատվամիջոցներին հոդվածներ պատվիրելու վրա:
Ի դեպ, նա մասնավորապես անդրադարձել է շուրջ 6 լրատվամիջոցի 40 հոդված պատվիրելու գործարքին, երբ յուրաքանչյուր հոդվածը մոտ 31 հազար դրամով նախարարությունը պատվիրում էր: Այս պրակտիկան կվերացվի, քանի որ այնպիսի տեքստեր են ներկայացված այդ հոդվածներում, որ կարելի է դրանք առանց վճարելու էլ, նախարարության միջոցներով տարածել մամուլում:
Ընդհանուր առմամբ, այս տարի նախատեսվում էր ծախսել 4 մլն 300 հազար դրամ: Այդ պրակտիկան Հայաստանի հարկատուներին արժեցել է 1 մլն դրամից ավել, այն էլ՝ ընթացիկ տարվա միայն առաջին հինգ ամսվա համար:
Ֆեյսբուքյան ստատուսների և հոդվածների միջոցով բարի և պարկեշտ երևալու պրակտիկան կա, և գերատեսչությունները գումարներ են տրամադրում նման հոդվածների և ստատուսների համար, պարզապես այս անգամ այդ պրակտիկայի ակնհայտ դրսևորում ի հայտ եկավ, այն էլ՝ անձամբ նախարարի ձեռքով:
Իհարկե, միջոցներ կխնայվեն` դադարեցնելով նախարարության նման ոչ ընդունելի վարքագիծը և սփյուռքի նախարար Մխիթար Հայրապետյանը, ով հաճախ է հայտնվում լրատվամիջոցների թիրախում իր երիտասարդ տարիքի, անփորձության, «սփյուռքագետի» վերաբերյալ արկածներով, այս անգամ իրոք անդրադարձավ այնպիսի մի պրակտիկայի, որն, իհարկե, պետք է դադարեցվի:
Հոդվածների պատվերի չեղարկումից նախարարը հաշվարկել է, որ միայն 2018 թվականի համար պետական բյուջե է վերադառնալու 3 մլն 40 հազար ՀՀ դրամ: