Եթե անհրաժեշտ լինի, Մարտի 1-ի գործով ես էլ, Ռոբերտ Քոչարյանն էլ կհարցաքննվենք. Փաշինյան
«Ես ասում եմ, որ Մարտի 1-ի գործը պետք է բացահայտվի, եթե դրա համար անհրաժեշտ կլինի, որ ես հարցաքնննվեմ, ապա ես կհարցաքննվեմ, եթե անհրաժեշտ կլինի, որ Ռոբերտ Քոչարյանը հարցաքննվի, Ռոբերտ Քոչարյանը կհարցաքննի»,- այսօր Ազգային ժողովում լրագրողների հետ զրույցում ասաց վարչապետ Նիկոլ Փաշինյանը:
Լրագրողների հարցին՝ կա՞ նման պրոցես և այդ անհրաժեշտությունն ինքը տեսնո՞ւմ է, Փաշինյանը պատասխանեց, որ այդ կապակցությամբ իր տեսակետն արտահայտել է և հերթն այժմ իրավապահ մարմիններինն է:
Հարցին, թե հնարավո՞ր է, որ կոռուպցիոն բացահայտումները հասնեն մինչև Սերժ Սարգսյանին, վարչապետը պատասխանեց. «Գիտե՞ք՝ ինչ, ես չեմ կարող ասել՝ ուր կհասնեն և ուր չեն հասնի: Որտեղ որ օբյեկտիվորեն կհասնեն, էնտեղ էլ կհասնեն, և ես կարող եմ ասել, որ այդ քննությունների և հետաքննությունների առաջ ոչ մի քաղաքական խոչընդոտ չի կարող լինել»:
Դիտարկմանը, թե կոռուպցիոներներին պետք է գլխից բռնել, Փաշինյանը կտրուկ պատասխանեց. «Մենք ընդհանրապետ գլխից արդեն բռնել ենք»: