Չստացված մեղրամսի ու կայֆի մասին․․․
Կառավարության ղեկավար Նիկոլ Փաշինյանի նոր սթայլից ետ չեն մնում նրա թիմակիցներն, ովքեր փոխարենն իրենց հատկացված ոսկե րոպեներն օգտագործեն կառավարման համակարգում ունեցած գիտելիքներն ի ցույց դնելու և աչքի զարնող փոփոխություններ կատարելու, բավարարվում են ընդամենը ֆեյսբուքյան PR ստատուսներով ու լայվերով։
Այսօր իր ֆեյսբուքյան էջն, օրինակ, թարմացրեց ՀՀ փոխվարչապետ Տիգրան Ավինյանը՝ որպես իր թափանցիկ աշխատելաոճի արգասիք ներկայացնելով իր գրասենյակի ղեկավար Սերժ Վարագ Սիսեռյանին:
Ավինյանը նշել է, որ Վարագը 29 տարեկան է, ծնվել է Ֆրանսիայում, 2011-ից բնակվում է Հայաստանում, կրթությունը ստացել է Բեյրութում և Երևանում, աշխատել է տարբեր ոլորտներում և ՔՊ անդամ է:
Թե «Քաղաքացիական պայմանագիր» կուսակցության հիմնադիր անդամ Վարագն ինչ կերպ իր փորձն ու հմտությունը կծառայեցնի հայոց պետականաշինության գործին, կերևա շատ կարճ ժամանակ անց, իսկ մինչ այդ՝ Վարագին մի քանի դիտարկում՝ պետք չէ նորաձև և կրեատիվ երիտասարդ երևալու համար ֆեյբուքյան էջում պատմել, օրինակ, «սեփական չստացված մեղրամսի» «կայֆի» ու «սուպեռի» մասին, ինչով արդեն հասցրել է աչքի ընկնել Արարատ Միրզոյանի օգնական Կարպիս Փաշոյանն, ում բառապաշարն ու բառաֆոնդը, մեղմ ասած, հարիր չէ իրեն տրված աշխատանքային պարտականություններին։
Առնվազն տհաճ է պետական կառավարման ապարատում հարկատուներիս հաշվին բարձր աշխատավարձ ստացող մարդկանց մոտ նման որակ տեսնելը, և սա այն պարագայում, երբ համալսարաններում օրնիբուն դասախոսություններ են կարդում և սերունդ կրթում երիտասարդ քաղաքագետներ, պետական կառավարման ոլորտի մասնագետներ՝ հարուստ ակադեմիական գիտելիքներով։
Եվ, այս համատեքստում, ուզում ես հիշեցնել և՛ Կառավարության ղեկավարին, և՛ Տիգրան Ավինյանին՝ պետական ապարատը չքաղաքականացնելու և չկուսակցականացնելու՝ իրենց նախորդների հասցեին արված քննադատությունների մասին՝ խորհուրդ տալով ճիշտ կադրեր ընտրել և բարձր պաշտոնների համար չնշանակել ԲՇՏ-երի պետերի, որոնց փորձը կամ դրա պակասը կարող է փորձանք դառնալ պետության գլխին։