Ալեքսանյանն ուրիշ է, նրանից էլ չկա
Այս երկու օրերին մամուլը լի էր Սամվել Ալեքսանյանի տան, գործարանների, Սիթիների ստուգումների վերաբերյալ տեղեկություններով:
Պարզվում է, որ սուպերմարկետների աշխատակիցներին տարել են ԱԱԾ' հարցաքննության, որ նրանց անունով ունեցվածք կա, որ կեղծ ՀԴՄ-ներ են տալիս, կարճ ասած, երկիրս ընկել է Լֆիկի հետևից: Եվ ով ինչքան մեղք ուներ-չուներ, պարզվում էր' երկրի տնտեսական բոլոր չարաշահումների, կեղծումների, հարկերից խուսափելու ամենամեղավորը հենց Ալեքսանյանն է: Դա երեկ: Այսօր արդեն վիճակը մի փոքր այլ է:
Կառավարության վաղվա նիստի օրակարգում ընդգրկված է «Ալեքս տեքստիլ» ընկերությանը ներմուծման մաքսատուրքից ազատելու արտոնություն տրամադրելու մասին որոշման նախագիծը։
Ի դեպ, նշենք, որ մաքսատուրքերից ազատվում էին նախկինում միայն որոշակի արտոնություններ ունեցող ընկերությունները, որոնք մոտ էին ՀՀԿ-ին կամ նրանց մերձավոր շրջապատին, և այսօր պարզ է, որ դեռևս Ալեքսանյանն Ալեքսանյան է և թամբին:
Ըստ կառավարության նիստի օրակարգի' «ԱԼԵՔՍ ՏԵՔՍՏԻԼ»-ին տրամադրվելու են արտոնություններ:
Այնուհետև նախագծում նշված է, որ նախագծի մշակումը պայմանավորված է «ԱԼԵՔՍ ՏԵՔՍՏԻԼ» սահմանափակ պատասխանատվությամբ ընկերության կողմից գերակա ոլորտում իրականացվող ներդրումային ծրագրի իրականացումն ապահովելու անհրաժեշտությամբ»,-հիմնավորում են կառավարությունից:
Մաքսատուրք չկիրառելու հայտում ընկերությունը նշել է նաև ներմուծվող ապրանքները՝ 145 տոննա տրիկոտաժե քաթաններ Թուրքիայից, 20 տոննա՝ Ուզբեկստանից, ևս 15 տոննա' Թուրքիայից:
«Արտոնության առկայությունը լուրջ խթան կհանդիսանա նոր ներդրումային ծրագրերի իրականացման և որպես հետևանք նոր աշխատատեղերի ստեղծման, ներդրումների ներգրավման, տեղական արտադրության և արտահանման խթանման համար»,-ասված է որոշման նախագծում:
Հետաքրքիր է, թե այդ ինչպես է պատահում, որ նախօրիեն ԱԱԾ-ն ստուգումներ էր կատարում Սիթիներում, այսօր կառավարությունը նրան արտոնություններ է տալիս:
Երևի հասկացել են, որ ուրիշ Ալեքսանյան էլ չի լինելու, պետք չէ տարիներով ձևավորված ձեռնարկատիրոջը շատ նեղացնել, չէ՞ որ կվերցնի, կփակի Սիթիները, և մարդիկ առևտրի տեղ չեն ունենա, կամ էլ ով գիտի ինչի՞ համար է:
Ալեքսանյան Սամվելը կար ՀՀՇ-ի ժամանակ, կար Քոչարյանի ժամանակ, բարգավաճում էր ՀՀԿ-ի ժամանակ, ըստ ամենայնի, Ելք է գտել նաև մեր օրերում: