Մշակույթի երիտասարդ նախարարուհին իր ափսեի մեջ չէ․ իր տեղը չի գտնում
Արամ Խաչատրյան համերգասրահում մշակութային գործիչները հանդիպել են վարչապետ Փաշինյանի հետ։
Մշակույթի նորանշանակ երիտասարդ նախարարուհին փորձել է անձամբ իրազեկել արվեստի գործիչներին։
Նա ֆեյսբուքյան իր էջում հայտարարել է հանդիպման մասին, հետո երևի մտածել է, որ ամեն դեպքում հնարավոր է շատերն իր էջին հետևելիս չլինեն և որոշել է զանգերով տեղեկացնել բոլորին։
Այսքանից հետո էլ դեռ նա չի հասցրել բոլորին իրազեկել։
Նախ, պետք է նկատել, որ նման դեպքերում իրազեկման պարտականությունները վերապահված են ո՛չ թե նախարարին, այլ նրա մամուլի քարտուղարին՝ իմա Անի Սմբատյանին։ Անին եղել է գյուղնախարարի մամուլի խոսնակը և հազիվ թե չիմանար, որ Լիլիթ Մակունցն իր գործն է անում այդ պահին։ Մինչդեռ հենց ինքն էր զբաղվելու հայտարարությունը համապատասխան մարդկանց հասցնելու գործով։ Դրա համար գոյություն ունի նաև Մշակույթի նախարարության կայքէջը։
Այստեղ կա նաև այլ մոտեցում․ գուցե շատերը մտածեն, որ Լիլիթ Մակունցն իրեն վեր չի դասում, և ինքն անձամբ է ցանկացել տեղեկացնել։ Ներեցե՛ք, իսկ այս դեպքում ինչո՞ւ է նախարարությունը կայքէջ պահում, որի աշխատողները վարձատրվում են, կամ էլ ինչ՞ն է պետք հասարակայնության ու լրատվության հետ կապերի բաժինը, որը դարձյալ ծախսատար է։
Այս դեպքում թող փակեն բաժինը, կայքէջը, ազատեն աշխատողներին և այդ գումարներն ուղղեն ավելի կարևոր նպատակների։
Սա ի միջի այլոց, իսկ իրականում ցավն այն է, որ պաշտոնյան իր տեղում չէ և չգիտի իր պարտականությունները։ Իսկ դրանք ավելի լուրջ գործեր են, քան ֆեյսբուքյան էջում գրառելը կամ հեռախոսազանգով հանդիպման մասին տեղեկացնելը։
Մի խոսքով՝ մշակույթի երիտասարդ նախարարուհին իր ափսեի մեջ չէ։
Այլ խնդիր է, որ տիկին նախարարը ցանկացել է սիրաշահել վարչապետին և «մարդ հավաքել»:
Արմինե Մկրտումյան