Հայաստանում հայրերը շարունակում են սպանել իրենց որդիներին․ վերջին նմանատիպ դեպքը եղավ երեկ
Հայրերի ու որդիների պայքար միշտ էլ եղել։ Այդ մասին գրվել են գրքեր, նկարահանվել ֆիլմեր։ Այդ ամենի մասին հիշատակումներ է անում պատմությունը, թե ինչպես են որդիները սպանել իրենց հայրերին, որ կառավարեն երկիրը։ Կան ավանդազրույցներ ու լեգենդներ այն մասին, թե ինչպես են հայրերը հանուն թագավորության ու պետության բարօրության սպանել իրենց որդիներին։ Սրանք պատմություններ են, լեգենդներ, առասպելներ։ Իրականում միշտ էլ եղել է ու այսօր ևս շարունակվում է այդ պայքարը։ Պայքարի խոշորացույցային տեսակն ընտանիքում է՝ հայր ու որդի, իսկ ավելի մեծ տարբերակը հասարակության մեջ է՝ սերունդների պայքար։
Այս ամենի հետ մեկտեղ կան նաև իրական դեպքեր։ Աշխարհում ու հայ հասարակության մեջ շատացել են սպանությունները։ Վիճակագրությունը ցույց է տալիս, որ շատ դեպքերում որդիներն են սպանում իրենց հայրերին։ Այդպիսի սպանությունների դեպքում, սովորաբար, մարդասպանը նշում է, որ գտնվել է աֆեկտիվ վիճակում։ Սակայն կա նաև սպանության այլընտրանքային տեսակ, երբ հայրը չի գիտակցում, թե ինչպես է դեպի մահ ուղեկցում իր որդուն։
Երեկ նմանատիպ դեպք եղավ Կոտայքի մարզում։ Ավտովթարի հետևանքով մահացավ վարորդը, ով 16 տարեկան էր, իսկ 2 հոգի, ովքեր նույնպես անչափահասներ էին, ծանր վիճակով տեղափոխվեցին հիվանդանոց։ Կարելի էր ոչինչ չիմանալ ու լսել այն կնոջը, ով այսօր երթուղայինում լաց էր լինում ու բարձրաձայն պատմում, թե ինչ է եղել։
«Ես նոր մենակ իմացա, թե ինչա եղել։ 3 էրեխա ավարիա են տվել ու ընկել են ձորը։ Մեկը մահացել ա։ Ես ճանաչում էի էդ երեխուն։ Տենաս ո՞վ ա իր հերը, ո՞վ ա իրան ավտո տվել, ո՞վ ա թողել, որ նստի ու քշի։ Մեղավոր ա մենակ իրա ծնողը, ով տվել ա էդ մեքենան։ Վատ բան ա, բայց պետք ա ասեմ։ Ամբողջ կյանքում էդ մեղքն իրանց ուսերին ապրելու են իրա հերն ու մերը, որ իրանց ձեռքով սպանեցին իրանց էրեխուն»։
Երթուղայինում լռություն էր։ Լսվում էր միայն կնոջ լացի ձայնը։ Իսկ երթևեկողները սառած աչքերով նայում էին պատուհանից դուրս։
Ու փաստացի այս խառնակ ժամանակաշրջանում ծնողներն իրենք են սպանում իրենց երեխաներին։ Անչափահասներին թողնում են, որ մեքենա վարեն, քանի որ «քշել գիտեն», իսկ արդյունքում լինում են նմանատիպ դեպքեր։ Ժամանակները փոխվել են, մարդիկ մտածում են այլ կերպ, իսկ այդ մտածողության արդյունքում մահանում են դեռ նոր-նոր կյանք մտած տղաներ, ովքեր ապագայում լինելու էին իրենց ընտանիքի զարդը, իսկ իրականությունը սա է․
Ավտովթարի հետևանքով մահացավ 16 տարեկան, անչափահաս տղա։