Հանրությունը բռնեց ապականող ձեռքը
«Փորձում են Նոյեմբերյանը ևս հանք դարձնել» գլխագրով NEWSPRESS.am-ն անդրադարձել է «Պոլիմետալ Արմենիա»-ի կողմից Ալավերդի և Շնող, Կողբ և Նոյեմբերյան համայնքների վարչական տարածքներում իրականացվելիք համալիր երկրաբանահետախուզությանը, որով նախատեսվում էր հայտնաբերել ու գնահատել ոսկու, արծաթի, պղնձի, մոլիբդենի, կապարի և ցինկի հեռանկարային հանքայնացումներ:
Այսինքն Հայաստանի ևս մեկ մարզ փորձում էին վերացնել՝ մի քանի հոգու հարստացման համար:
Այս հայտարարությունը միանգամից բացասական արձագանք ստացավ թե՛ մարզի ակտիվ քաղաքացիների, թե՛ լրատվամիջոցների կողմից: Քաղաքապետից սկսած մինչև հասարարական գործիչներ դեմ արտահայտվեցին ծրագրի իրականացմանը, ինչին հաջորդեց «Պոլիմետալ Արմենիա» սահմանափակ պատասխանատվությամբ ընկերության հայտարարությունն առ այն, որ «առաջնահերթ կարևորելով իր գործունեության դրական հանրային ընկալումը»՝ դադարեցնում է Լոռու մարզի Ալավերդի եւ Շնող, Տավուշի մարզի Նոյեմբերյան եւ Կողբ համայնքների վարչական տարածքներում երկրաբանահետախուզական աշխատանքների ծրագրի՝ շրջակա միջավայրի վրա ազդեցության փորձաքննության իրականացման եւ այդ գործընթացի շրջանակներում հանրային քննարկման կազմակերպման ուղղությամբ աշխատանքները:
Սա փաստեց այն մասին, որ հանրային ճնշման տակ հնարավոր է խնդիրներ կարգավորել և ահա այս դեպքը պետք է օրինակ ծառայի տարբեր մարզերի համար, որպեսզի թույլ չտան Թեղուտի ցավալի կրկնությունը մեր երկրում:
Միաժամանակ խիստ անհրաժեշտություն է քաղաքացիների և լրատվամիջոցների կողմից հետևողական մոտեցում, որպեսզի «Պոլիմետալ Արմենիա» կամ Վալլեքս կամ մեկ այլ ընկերություն չկարողանա իր կեղտոտ ձեռքերով աղտոտել, ապականել հայաստանյան հրաշագեղ բնությունը: