Ովքեր ասում են, թե «Անտարեսի» մրցույթը լայքացավ է, մարդիկ են, ովքեր ոչ մի գիրք չեն կարդացել. Արմեն Մարտիրոսյան (տեսանյութ)
Դատելով այսօրվա ակտիվությունից, որ կա գրքի շուրջ գրադարաններում, կտեսնենք՝ այսօր ավելի շատ ընթերցում են երիտասարդները։ Ասել, որ նախորդ սերնդի մարդիկ անտարբեր են գրքի նկատմամբ, սխալ կլինի։ Այդ մասին այսօր «Անդրադարձ» մամուլի ակումբում ասաց «Անտարես» հրատարակչության գլխավոր խմբագիր, գրականագետ Արքմենիկ Նիկողոսյանը՝ հավելելով, որ կարող ենք արձանագրել, որ ընթերցողական ճգնաժամը տեղի է տալիս։
Այսօր՝ փետրվարի 19-ին, երբ նշվում է նաև Գիրք նվիրելու օրը, «Անտարես» հրատարակչության տնօրեն Արմեն Մարտիրոսյանն իր հերթին մտահոգություն հայտնեց, որ այս օրը նմանվում է Ամանորին։ Մարդիկ գիրք կնվիրեն այսօր, սակայն մյուս օրերին կմոռանան գիրք նվիրելու մասին։ Մինչդեռ, ըստ բանախոսի, տարվա ոչ թե 365, 366, այլ 367 օրերը պետք է գիրք կարդալու և նվիրելու օրեր լինեն։
Մարտիրոսյանը բարձրացրեց ծնողների, հասարակության վերաբերմունքի խնդիրը գրադարանավարների մասին։ Բերելով եվրոպական մի շարք երկրների օրինակը, որտեղ գրադարանավարները նույնիսկ այցելում են երեխաներին դեռ մանկուց, Մարտիրոսյանը հռետորական հարց է տալիս՝ ինչո՞ւ է գրադարանավարների աշխատավարձը մեր երկրում շատ ցածր․ «Ինչո՞ւ գրադարանավարը մեր հասարակության մեջ հեղինակություն չէ»,- հարցնում է բանախոսը ու նկատում, որ դա հասարակության խնդիրն է:
Անդրադառնալով ֆեյսբուքյան մրցույթին, որը հրատարակչությունն ամեն տարի անցկացնում է, Արքմենիկ Նիկողոսյանն իր հերթին նկատեց, որ այդ մրցույթին մասնակցում են լավագույն գրքերը, որովհետև տեսակետ կա, որ չվաճառվող գրքերն են մասնակցում մրցույթին:
Շարունակելով հասարակության քննադատության թեման՝ Արմեն Մարտիրոսյանը նշում է. «Ասում են՝ լայքացավ, լայքի մուրացկաններ: Դրանք մարդիկ են, ովքեր ոչ մի գիրք չեն կարդացել, իրենց տեղն իրենց կամ մեր տան նկուղն է։ Նրանք մարդիկ են, ովքեր լույս տարածելը մուրացկանություն են համարում»։
Հարցին, թե որոնք են ամենահաճախն ընթերցվող գրքերը՝ Արքմենիկ Նիկողոսյանն ասաց, որ դրանցից են Վլադիմիր Նաբոկովի «Լոլիտան», Օրհան Փամուքի «Կարմրահեր կինը», Հյուգոյի «Փարիզի աստվածամոր տաճարը», Ստենդալի «Կարմիրը և սևը»: Վերջին շրջանում հատկապես պոպուլյար է Գուրգեն Խանջյանի «Տուր ձեռքդ, պստլո» վեպը։
Մանրամասները՝ տեսանյութում