Իշխանությանը «եվրոպական ապերկոտը» չափազանց ցավոտ էր, բայց ոչ անակնկալ
Ժամանակին դասականն ասել էր Նիկոլ Փաշինյանի իրականացրած իշխանափոխության մասին, թե համբերեք, Փաշինյանին կկործանեն կողքին կանգնածները։
Իհարկե, մեծ շախմատիստին դժվար է համարել մարգարեական հատկություններ ունեցող, սակայն ըստ ամենայնի քայլ առ քայլ իրականանում է նրա ասածը։ Կիսատ պռատ թիմով մեծ քայլեր ձեռնարկելով, ձախողումը արձանագրվում է ձախողման հետևից։
Հերթականը եւ ամենալուրջը թերևս Սահմանադրական դատարանի հետ է կապված։ Նախ, հայտնի դարձավ, որ դատարանը վարույթ չի ունել ԱԺ միջնորդությունը, կապված ՍԴ նախագահ Հրայր Թովմասյանի՝ լիազորությունների դադարեցման հարցը քննարկելու վերաբերյալ։ Ապա արդեն Արփինե Հովհաննիսյանը հրապարակեց հատվածներ Վենետիկի հանձնաժողովի եզրակացությունից, որը կարելի է ասել, որ քարը քարի վրա չթողեց իշխանությունների նկրտումներն ու նպատակները։ Ասել է, թե Սահմանադրական դատարանը կշարունակի մնալ այն կազմով ու այն հունի մեջ, որում կա հիմա։
Թե հիմա փաշինյանական թիմի իրավաբանները ինչ կերպ սրա տակից դուրս կգան, դժվար է ասել։ Ամենայն հավանականությամբ քաղաքական առևտուրը մերժվել է ու Հրայր Թովմասյանը Ստամբուլյան կոնվենցիայի դիմաց գործարքը կամ մերժվել է, կամ էլ, ինչ որ մի պահից որպես այդպիսին չեղարկվել, թե ինչու, իհարկե դժվար է ասել; Սակայն, եվրոպական ուղղությունից Երևան եկած մյուս մեսիջն էլ պակաս ինտրիգային չէ։
Երկրորդ նախագահ Ռոբերտ Քոչարյանի գործով Սահմանադրական դատարանի խորհրդատվական հարցումն ուղարկված ՄԻԵԴ-ում ընթացք է ստացել․ ավելի կոնկրետ՝ ՄԻԵԴ-ը կկազմի 17 դատավորներից բաղկացած մեծ պալատ, հարցը քննարկելու համար։ Եվրոպան լրջագույն մեսիջներ է հղում Երևանին ու ամենայն հավանականությամբ, դրանք գնալով ավելի կկոշտանան։
Այս իրավիճակում իշխանություններին մանևրելու տեղ գրեթե չի մնացել։ Միակ հույսը, տոտալ հեղինակազրկումից խուսափելու համար, գոնե այս փուլում ներքին լսարանի աչքում, Ստամբուլյան կոնվենցիան առկախելն է, հնարավորինս երկար ժամանակով, այլապես դրսի հեղինակազրկումից հետո ներքին հեղինակազրկումն էլ կարող է ընդհանուր բարոյահոգեբանական կազմաքանդման բերել հենց իշխանականների մոտ, ու այստեղ չի օգնի նույնիսկ պայմանական Անդրանիկ Քոչարյանի՝ Փաշինյանի կողմից պայմանական չհանձնման, պայմանական «գնի վճարման» տեսքով ելույթներն ու հարցազրույցները։
Իշխանությանը «եվրոպական ապերկոտը» չափազանց ցավոտ էր, բայց ոչ անակնկալ, գոնե հաշվի առնելով վերջին օրեին մի շարք առանցքային դեսպանների այցը Հրայր Թովմասյանին։
Յակոբ Բերգեր