Ենթադրելի է՝ Անդրանիկ Քոչարյանը Փաշինյանի թիմում դեռ անելիք ունի
Արփինե Հովհաննիսյան-Անդրանիկ Քոչարյան միջադեպը, դեռ կարծես թե չի հանգել, չնայած հասարակության ուշադրության կենտրոնում այժմ այլ խնդիրներ են հայտնվել։ Համենայն դեպս պատգամավոր Անդրանիկ Քոչարյանը հանդես է եկել պարզաբանմամբ, որտեղ փորձել է ներկայացնել իր հայտարարությունների բուն բովանդակությունը, ինչպես և սպասելի էր, մեղադրելով տարբեր անձանց դրանց աղավաղման և այլնի մեջ։
Նա մասնավորապես ասել է․ «Բոլորս գիտեինք, որ նախկին նախարարի մայրը կատարել է ՔԿԱԳ բաժնի պետի գործառույթներ, ինչը հանրային պաշտոն է, և բնականաբար ապօրինի գույքի վերադարձի մասին օրենսդրության ընդունման դեպքում Արփինե Հովհաննիսյանի մայրը պետք է հիմնավորի իր կուտակած ունեցվածքի հիմքերը: Ահա, ոչինչ չէինք լսել նախկին նախարարի հոր հանրային սեկտորում ունեցած կարգավիճակի, մասնավորապես՝ ի՞նչ պաշտոններ է զբաղեցրել, ընկնում է արդյո՞ք նշված օրենքի կիրառման դաշտ, ինչով էլ պայմանավորված օգտագործեցի անհայտ բառը»։
Ինքնին հասկանալի է, որ Անդրադնիկ Քոչարյանը փորձում է այսպես ասած «անհայտ հայրիկ» կապակցության տակից դուրս գալ, ինչն էլ նրա հասցեին ուղղված հազարավոր քննադատությունների առիթն էր դարձել: Ակամա հաստատվում է մամուլում պտտվող այն թեզը, թե Փաշինյանի թիմում որոշել են Անդրանիկ Քոչարյանին «չհանձնել», ինչը նկատվում էր նաև իշխանական թևից խնդրո մասին կարծիք հայտնածների հայտարարություններից։
Այս համատեքստում թերևս ամենից էական հարցն այն է, թե հանուն ինչի է որոշել Նիկոլ Փաշինյանը չհանձնել Անդրադնիկ Քոչարյանին, որն է լինելու նրա առաքելությունը և մինչև որ փուլ է ձգվելու «չհանձնելու քաղաքականությունը»։ Հասկանալի է, որ այդ փուլը եթե ունի սկիզբ, կունենա նաև ավարտ, բայց մինչև ավարտին հասնելը թե ինչով է «հատուցելու» «չհանձնվածը», մնում է միայն սպասել ու հետևել զարգացումներին։
Յակոբ Բերգեր