2008-ի մարտի 1-ի երեկոյան Ծառուկյանը հրավիրվել է կառավարություն
«Ես ի՞նչ կարգավիճակ կարող եմ ունենալ, համապատասխան փորձեք ճշտել քննչական մարմնից»: ԱԺ-ում լրագրողների հետ ճեպազրույցի ժամանակ հայտարարեց «Բարգավաճ Հայաստան» կուսակցության նախագահ Գագիկ Ծառուկյանը՝ պատասխանելով հարցին, թե ինչ կարգավիճակով է մասնակցել «Մարտի 1»–ի գործի շրջանակում հարցաքննության:
Լրագրողները նրան հիշեցրին, որ ժամանակին հայտարարում էր, թե եթե պարզվի, որ ինքը «Մարտի 1»–ի հետ կապ ունի, ապա պատրաստ է հրապարակային գնդակահարության ենթարկվել: Արձագանքելով այս դիտարկմանը՝ Գագիկ Ծառուկյանն ասաց․ «Միանշանակ ուժի մեջ է, այդպիսի ապացույցների դեպքում թող գնդակահարեն։ Գագիկ Ծառուկյանը «Մարտի 1»–ի հետ կապ չի ունեցել, Ծառուկյանն ասել է, այո՛, պետք է խումբ ստեղծվի, քննեն, մեղավորները, պետք է պատժվեն»:
Միաժամանակ, ԲՀԿ ղեկավարը տեղեկացրեց, որ 2008-ի մարտի 1-ի երեկոյան իրեն հրավիրել են կառավարություն։ «Կառավարությունից զանգ է եղել, հրավիրել են կառավարության շենք, գնացել եմ այնտեղ, մնացել 25 րոպե-կես ժամ՝ տեսնելով, որ խառնաշփոթ իրավիճակ է, թողել եմ ու գնացել, ոչ մեկին չեմ տեսել, ոչ մի քննարկում չի եղել, տեսնելով, որ լուրջ բան չկա, թողեցի գնացի»,- ասաց Ծառուկյանը՝ չմանրամասնելով, թե կոնկրետ ում հետ է հանդիպել: