Իսկ ո՞ւր է «Իմ քայլի» միջի ընդդիմությունը
Այսօր Երևանի ավագանին բավականին թեժ նիստ էր գումարել, ոմանք փորձում էին ընդդիմադիր ֆոն ստանալ, ոմանք էլ անելիք չունեին՝ ձանձրանում էին։
Ավագանին հաստատեց Երեւան համայնքում տեղական տուրքերի 2019 թվականի դրույքաչափերը սահմանելու մասին՝ Երեւանի ավագանու որոշման նախագիծը: Ըստ այս որոշման՝ փոփոխության են ենթարկվել Երեւանում ոչ հիմնական շենք-շինությունների համար նախատեսված շինթույլտվության տրամադրման համար տեղական տուրքի դրույքաչափերը: Փոփոխության են ենթարկվել նաեւ Երեւանի վարչական տարածքում առեւտրի, հանրային սննդի, զվարճանքի, շահումով խաղերի, վիճակախաղերի կազմակերպման օբյեկտների, խաղատների, բաղնիք-սաունաների՝ ժամը 24:00-ից աշխատելու համար տեղական տուրքերը: Կարճ ասած՝ նոր ընտրված ավագանին սկսեց թանկացումների շքերթը։
Հետաքրքիր է, որ հանրությունն ակնկալիք ուներ, որ իրենց կյանքում փոփոխություններ կլինեն, կսկսեն հարկերը նվազեցվել, ամեն դեպքում՝ սևեր ու սպիտակներ չեն լինի, ավագանին ավելի պրոդուկտիվ կաշխատի, սակայն այդպես չեղավ։ Այս ավագանիում չկա իրական ընդդիմություն, չկա ընդդիմադիր ուժի սուր աչք և վերահսկողություն, շոու և միայն շոու` սեփական հեղինակությունը բարձրացնելու նպատակով։
Մի հարցազրույցում «Իմ Քայլից» ավագանու անդամ Լուսինե Բադալյանն ասել էր՝ մենք 57 հոգի ենք, բայց 57-ն էլ այնքան իրարից տարբեր են և այնքան միաձայն չի ընդունվում որևիցե բան, կարծես այդ դաշինքի մեջ ընդդիմությունների խումբ լինի, կա ազատություն՝ հանգիստ չհամաձայնելու, նախապես որևիցե թելադրանք չի լինում, այնտեղ անհատականություններ են, սա այն է, ինչ ես տեսել եմ, ինչպես հասկանում եմ իրավիճակը, այնպես չէ, որ ՀՀԿ-ի նման կուռ մասսա է, այստեղ բազմակարծություն է»,- առաջին նիստից հետո այսպիսի բնորոշում էր տվել ավագանու իշխանական խմբակցությանը Լուսինե Բադալյանը։
Սակայն այսօր թանկացումներին կողմ քվեարկած ուժը կրկնեց նույն ՀՀԿ-ի ձևաչափը, երբ հարցը դրվում էր քննարկման և անցնում առանց տարաձայնությունների։ Այսօրվա ավագանին նույնպես աշխատում է հրահանգավորված. ձեռք են բարձրացնում այն ժամանակ, երբ պետք է, և լռում են՝ երբ կրկին պետք է։
Եվ այստեղ է ճիշտ ասել՝ մենք ճիշտ էինք, Լուսինե Բադալյանը՝ սխալ, երբ պնդում էինք, որ ավագանիում այսչափ թույլ ընդդիմությունը, նույնը՝ խորհրդարանում, հաստատ ի նպաստ Հայաստանի զարգացման չէ։ Յուրաքանչյուր ժողովրդավար համակարգում իշխանությանը հակակշռող ընդդիմություն է պետք, ինչը, սակայն, այս իշխանությունների համար ընդունելի չէ. խեղդում են յուրաքանչյուր ընդդիմադիր ձայն։