Արշակյանն այստեղ չէ, բարձրախոսս չի անջատի. Արմենուհի Կյուրեղյան
Արշակյանն այստեղ չէ, բարձրախոսս չի անջատի և ասեմ, որ Վանաձորի պոլիկլինիկաներով անցել եմ և լավագույն դեպքում, եթե ինտերնետը կա, համակարգը ծանրաբեռնված չէ և բավարար կարողությամբ բժիշկը, երբ գրում է մեկ դեղատոմս, ապա մեկ դեղի համար պահանջվում է 7-8 րոպե, խորհրդարանում հայտնեց «Հայաստան» Խմբակցության պատգամավոր Արմենուհի Կյուրեղյանը՝ դիմելով առողջապահության նախարար Անահիտ Ավանեսյանին։
Պատգամավորը հիշեցրեց, որ նախարարը հայտարարել էր, թե մեկ դեղատոմս գրելու համար բժշկից կպահանջվի 2 րոպե։
Կյու8եղյանը նշեց, որ եթե մեկ հիվանդի համար մի քանի դեղատոմս է գրվում, ապա դրա համար պահանջվում է 10-15 րոպե և բացի դրանից բժիշկը թղթի վրա է գրում դեղատոմսը հիվանդին փոխանցելու համար, որովհետև հիվանդն այն պետք է ունենա։
Ընդդիմադիր պատգամավորը հարցրեց, թե դրանով բժշկի ծանրաբեռնվածությունը ավելացնո՞ւմ են, թե՞ ոչ։
«Սրանով մենք բժշկի ծառայությունները մատուցած հիվանդների թիվը պակասեցնո՞ւմ ենք, թե՞ ոչ, բարձրացնո՞ւմ ենք բժշկի ծանրաբեռնվածությունը և նախատեսո՞ւմ եք աշխատավարձերի բարձրացում։ Չէ՞ որ մենք լուրջ ծանրաբեռնվածություն ենք ավելացնում բժշկի վրա՝ առանց աշխատավարձի բարձրացման»,- հարցրեց պատգամավորը։
Անահիտ Ավանեսյանն էլ արձագանքեց՝ ասելով, որ նախկինում լրացվող թղթային տարբերակն ավելի շատ ժամանակ էր պահանջում՝ նաև այն մատյանում լրացնելու համար։
Ըստ Ավանեսյանի՝ էլեկտրոնային դեղատոմսի դեպքում հիվանդի տվյալներն ավտոմատ գեներացվում է և բժշկին մնում է դեղերը դեղատոմսում լրացնել։
«Այն լավագույն դեպքում 2-3 րոպե է տևում և որոշակի հմտությունների բացակայության դեպքում, այո, կարող է 7-8 րոպե տևել»,- ասաց Ավանեսյանը՝ հավելելով, որ քրոնիկ հիվանդների դեպքում հաջորդ ամիս նույնը լրացնել պետք չէ։
Նա հայտնեց, որ նախատեսում են հիվանդների պատմագրերը նույնպես էլեկտրոնային դարձնեն և տարակուսեց, թե ինչու է բժիշկը հիվանդին թղթային դեղատոմս գրում։
Արմենուհի Կյուրեղյանը բացատրեց, որ թղթային տարբերակի վրա բժիշկը գրում է, թե հիվանդը որ դեղը երբ և ինչ չափաբաժնով պետք է ընդունի։