Թող գան-գնան, հարցը դրանով չի լուծվելու, դա չի խանգարի երկու օր հետո գործողություն կատարելուն. Սիմոնյանը՝ ՀԱՊԿ գլխավոր քարտուղարի այցի և կառույցի՝ ՀՀ-ից դուրս գալու մասին
Չկա որևիցե քայլ, որը ՀԱՊԿ-ի անդամ լինելը մեզ այս պահի դրությամբ խոչընդոտում կամ անհանգստություն է պատճառում: Այս մասին լրագրողների հետ զրույցում Ազգային ժողովում հայտարարեց ԱԺ նախագահ Ալեն Սիմոնյանը:
Նրա խոսքով՝ ինքը խոսել է դրա մասին և ասել, որ անկախ նրանից, թե որ կազմակերպության մեջ ենք գտնվում, և թե ինչ հետևություններ կարող են անել այս իրավիճակից, ապա նշում, որ իրենք շարունակում ենք բոլոր հնարավոր ճանապարհներով փնտրել ՀՀ անվտանգությունն ապահովելու համար:
«Իսկ քաղաքական առումով՝ եկավ-գնաց... է՜ թող գան-գնան, հարցը դրանով չի լուծվելու, դա չի խանգարի երկու օր հետո գործողություն կատարելուն: Դրա փորձը ունեցել ենք էլ ավելի բարձր պաշտոնյաների այցելություններից հետո»,- նշեց Սիմոնյանը:
Նա ևս մեկ անգամ կրկնեց, որ անկախ նրանից, որ կազմակերպության մեջ ենք գտնվում՝ մենք շարունակում ենք բոլոր հնարավոր ճանապարհները փնտրել ՀՀ անվտանգությունն ապահովելու համար: Հաճախ ՀԱՊԿ-ի կողմից սուր արձագանքները հենց սրա պատճառով են:
«Բայց միևնույն ժամանակ մենք հավատարիմ ենք մեր ստորագրությանը: Այս պահի դրությամբ ՀԱՊԿ-ի այն գործողություններն ու արձագանքները, որոնք որ կան, միանշանակ ՀՀ-ին բավարար չեն»,- նշեց Սիմոնյանը: