«Միջին աշխատավարձը ավելի քան 10 տոկոսով աճել է, բայց գնաճը այդքան չի եղել». Քերոբյան (տեսանյութ)

ՀՀ Էկոնոմիկայի նախարար Վահան Քերոբյանը հերթական անգամ վստահեցնում է, որ երկրում տնտեսական աճ է գրանցվել, իսկ մարտ ամիս էլ խոստանում է 7-7,5 տոկոսի աճ:

Կառավարության նիստից հետո լրագրողների հետ ճեպազրույցում անդրադառնալով գնաճին, Քերոբյանը նշեց, որ Հայաստանում գնաճը մեծ է:

Դիտարկմանը, թե նիստի ժամանակ Փաշինյանը խոսեց գնաճից, Քերոբյանն արձագանքեց, թե ինքը չի կարծում, որ վարչապետը նեղսրտում է գնաճից: Իսկ եթե նա այնուամենայիվ ասում է, որ գնաճ կա, ապա դա չի նշանակում, թե դժվարանում է հաց առնել.

«Մենք այդ հարցին նայում ենք հասարակ քաղաքացու տեսանկյունից և ապրում ենք այն ցավը, որն ապրում է հասարակ քաղաքացին գնումներ կատարելիս»,-ասաց նա:

Վահան Քերոբյանը, չգիտես ինչու, գնաճը համեմատում է Թուրքիայի հետ՝ նշելով, որ այնտեղ ավելի մեծ գնաճ կա.

«Մեր հարևան Թուրքիայում գնաճը եղել է 16 տոկոս, այն դեպքում, երբ մեր մոտ եղել է կարծեմ 5,6 տոկոս»,-ասաց նա:

Քերոբյանը գնաճը մեծ չի համարում, քանի որ, ըստ նրա, գնաճին զուգահեռ, բարձրացել է նաև աշխատավարձը:

«2019-ի համեմատ միջին աշխատավարձն ավելի քան 10 տոկոսով աճել է, բայց գնաճը այդքան չի եղել»,-ասաց նախարարը:

Թե այդ դեպքում ինչո՞ւ են մարդիկ ասում, որ գնաճ կա, իսկ աշխատավարձը չի բարձրանում և դժգոհ են գներից ու սոցիալական վիճակից, Քերոբյանը չգիտի, ասում է, թե նման բան չի լսել և չի տեսել.

«Ցույց տվեք, ովքեր են դժգոհ, թվեր, թվեր ապացույցներ»,-ասաց Քերոբյանը: Նա նկատում է, որ ինքը վիճակագրության ներկայացրած տվյալներով է առաջնորդվում և գիտի՝ գնաճ մեծ չէ, աշխատավարձն էլ բարձրացել է:

Տեսանյութ