Արիության մեդալը զինվորի հորը հանձնել է տաքսու վարորդը` պայմանավորված վայրում
Ֆեյսբուքյան օգտատեր Հասմիկ Մարտիրոսյանը գրառում է արել, պատմելով, որ Հադրութում զոհված իր քրոջորդին «Արիության» մեդալով է պարգևատրվել, սակայն մեդալը նախապես պայմանավորված վայրում հերոսի հորն է հանձնել տաքսու վարորդը։
«Ռոբերտն ա՝ քրոջս տղան։ Հետմահու Արիության մեդալով ա պարգևատրվել, որը տաքսու վարորդը հանձնել ա հորը։ Քաղաքում մի տեղ պայմանավորվել են տոպրակով տվել ու գնացել ա։
Կրկնեմ՝ Հադրութում զոհված 18 տարեկան տղայի Արիության մեդալը տաքսու վարորդն ա հանձնել։ Տաքսու վարորդը։
Ինչի՞ համար։ Որպես ի՞նչ։
Քանի օր ա փորձում եմ սա կուլ տալ, բայց կանգնել ա կոկորդիս ու դանդաղ խեղդում ա, շատ դանդաղ։
Հասկանո՞ւմ եք որ էս ձևով տված պարգևը ավելի շուտ ընտանիքի երեսին շպրտված ողորմության ա նման, քան երախտագիտության։ Հասկանու՞մ եք, որ դրանով ավելի շուտ անարգում եք էդ մարդկանց վիշտը, քան ոգեկոչում իրենց երեխայի հիշատակը։ Վստահ չեմ, որ հասկանում եք։
Կլինի՞ ինքներդ ձեզ, ինչու չէ մեզ էլ, լավություն անեք ու էլ ոչ մեկին էս ձևով չպարգևատրեք։
Շնորհակալ ենք, բայց ձեզ պահեք էդ պարգևը»,– գրել է Մարտիրոսյանը և հավելել, որ Արմավիրի քաղաքապետ Դավիթ Խուդաթյանը կապվել է իր հետ և ասել, որ ինքն ու զինկոմիսարիատը գրառումից են տեղեկացել Ռոբի մեդալի մասին։
Ներողություն է խնդրել, ասել, որ անթույլատրելի է։ Մանրամասներն իմանալու համար կկապվի ընտանիքի հետ»,-գրել է Մարտիրոսյան Հասմիկը: