Մահացել է «Ճակատագրի հեգնանք, կամ Բաղնիքդ անուշ», «Ծառայողական սիրավեպ» ֆիլմերի հերոս, կինոյի աստղ Անդրեյ Մյագկովը
Մահացել է խորհրդային կինոյի աստղ Անդրեյ Մյագկովը: Այս մասին հայտնում է ՌԻԱ Նովոստին:
Սիրված դերասանի մահվան պատճառները դեռ չեն հայտնվում: Դեռ հայտնի չէ նաև դերասանի հուղարկավորության օրն ու վայրը:
Մյագկովը 82 տարեկան էր:
Կենսագրություն
Անդրեյ Մյագկովը Խորհրդային Միության հայտնի դերասաններից մեկն էր: Կինոյում առաջին անգամ նկարահանվել է 1965 թվականին` «Ատամնաբույժի արկածները» կինոնկարում: Սակայն նրան համընդհանուր ճանաչում բերեց Էլդար Ռյազանովի հետ երկար տարիների համագործակցությունը` նկարահանվելով «Ճակատագրի հեգնանք, կամ Բաղնիքդ անուշ» (1975 թ.), «Ծառայողական սիրավեպ» (1977 թ.), «Ավտոտնակ» (1979 թ.) և «Դաժան ռոմանս» (1984 թ.) ֆիլմերում:
Կինոգետների կարծիքով Անդրեյ Մյագկովը ավելի շատ կատակերգու դերասան է, չնայած նրա խաղացանկում առկա են խոշոր դրամատիկական դերեր, ինչպիսին է օրինակ` գիտնական Շվիրկովի դերը Մառլեն Խուցիևի «Վերջաբան» (1983 թ.) ֆիլմում: