Այստեղ ամեն ինչ անում են, որ հաղթի կյանքը. Արթմեդ ԲՎԿ
«Արթմեդ» բժշկական և վերականգնողական կենտրոնի ընդհանուր և որովայնային վիրաբուժության բաժանմունքը իրականացնում է լայնածավալ գործունեություն որովայնի խոռոչի օրգանների, կրծքագեղձի և կերակրափողի ուռուցքային և ոչ ուռուցքային հիվանդությունների պլանային և ուրգենտ վիրահատական բուժման ասպարեզում: Ամենից շատ ու մեծ հաճախականությամբ այստեղ կատարվում են ստամոքսի քաղցկեղի, հաստ և ուղիղ աղիքի քաղցկեղի, ենթաստամոքսային գեղձի քաղցկեղի վիրահատություններ: Սրանք բավական բարդ ու ծավալուն միջամտություններ են, որոնք պահանջում են վիրաբուժական բարձր կատարողական տեխնիկա և հմտություններ: Ու շատ հաճախ նման ծանր հիվանդները ուղղորդվում են հենց «Արթմեդ» բժշկական և վերականգնողական կենտրոնի ընդհանուր և որովայնային վիրաբուժության բաժանմունքի ղեկավար օնկովիրաբույժ, բ.գ.դ., պրոֆեսոր Արթուր Մուշեղի Սահակյանի մոտ:
«Արթմեդ» ԲՎԿ որովայնային և ընդհանուր վիրաբուժության բաժանմունքն այն բացառիկ կենտրոններից է, որտեղ դիմում են քաղցկեղի ամենավտանգավոր տեսակն ունեցող հիվանդները: Դրանք որովայնի խոռոչի օրգանների (ստամոքս, ենթաստամոքսային գեղձ, հաստ և ուղիղ աղիներ,լյարդ) և կերակրափողի ուռուցքներն են, որոնք օրգանիզմում դարանակալում են երկար, զարգանում են դանդաղ, առանց ախտանիշների ու բացահայտվում բավական ուշ, երբ արդեն լինում են խոր քաղցկեղային օջախներ ու տարբեր օրգաններում մետաստազներ: Քաղցկեղի այդ տեսակները պահանջում են ծավալուն, երբեմն կոմբինացված վիրահատություններ, որոնք այս բաժանմունքում՝ հանձինս օնկովիրաբույժ Արթուր Մուշեղի Սահակյանի կատարվում են բարձր պրոֆեսիոնալ մակարդակում ու տալիս բավական դրական արդյունքներ:
Բժիշկ Սահակյանի կարիերայի սկզբում ՝ 1980-1990-ական թվականներին, պլանային օնկոլոգիան շատ ցածր մակարդակում էր, դա վերաբերում էր հատկապես քաղցկեղի ծանր տեսակների բուժմանը: Արթուր Մուշեղի Սահակյանը առաջին վիրաբույժներից էր Հայաստանում, որ սկսեց զբաղվել կերակրափողի և ստամոքսի կարդիոէզոֆագեալ քաղցկեղների վիրահատական բուժմամբ ու սկսեց վիրահատական միջամտությամբ բուժել նաև ենթաստամոքսային գեղձի քաղցկեղը: Նա նաև խոշոր ներդրում ունի ավշային անոթների լայնածավալ հատման, քաղցկեղի համակցված մասնահատումների, քաղցկեղի կրկնությունների ծավալուն վիրահատական միջամտությունների և վերակառուցողական եղանակների ներդրման մեջ:
«Արթմեդ» բժշկական և վերականգնողական կենտրոնի ընդհանուր և որովայնային վիրաբուժության բաժանմունքում տարեկան մոտ 300 վիրահատություն է կատարվում:
Այստեղ անում են ամեն ինչ քաղցկեղի ցանկացած փուլում իրենց դիմած հիվանդին մաքսիմալ արդյունավետ օգնություն ցուցաբերելու համար: Եթե պացիենտը դիմել է վաղ փուլերում, կատարվում է ռադիկալ բուժական միջամտություն, երբ հնարավոր է հեռացնել ուռուցքն ու ստանալ լավ արդյունք, իսկ ավելի ուշ փուլերում, երբ կա արդեն քաղցկեղի լայն տարածվածություն, բաժանմունքում իրականացնում են պալիատիվ (ամոքիչ) միջամտություններ և կատարում քիմիոթերապիա: Բժիշկ Սահակյանը մանրամասնորեն պլանավորում է յուրաքանչյուր վիրահատությունը, կանխատեսում հավանական բարդություններն ու նախօրոք որոշում դրանց լուծման ամենաարդյունավետ տարբերակները: Դա արվում է, որ վիրասրահում բարդության առնչվելիս արագ արձագանքելու և ժամանակ չվատնելու համար: Միայն վիրահատությանը մանրակրկիտ պատրաստված վիրաբույժն է կարողանում հնարավորինս կրճատել վիրահատության տևողությունը և բուժման ավելի լավ արդյունքներ ունենալ, համոզված է բժիշկը: Նա պետք է պատրաստ լինի ցանկացած անսպասելի իրավիճակի, ու կարողանա լուծում գտնել յուրաքանչյուրի համար. «Ինչպես ջազն է անհնար առանց իմպրովիզների,այնպես էլ վիրաբուժությունում անհնար է միշտ վիրահատել նույն կերպ առանց իմպրովիզների: \
Յուրաքանչյուր օրգանիզմ տարբեր է, և յուրաքանչյուր օրգանիզմում քաղցկեղը զարգանում է այլ կերպ: Եվ ինչպես ջազմենը իր յուրաքանչյուր ելույթի ժամանակ, վիրաբույժն էլ վիրահատելու ժամանակ ստիպված է լինում իմպրովիզներ կատարել, նորամուծություններ անել հօգուտ պացիենտի»:
«Արթմեդ» բժշկական և վերականգնողական կենտրոնի ընդհանուր և որովայնային վիրաբուժության բաժանմունքում յուրաքանչյուր պացիենտի համար հրավիրվում է թումոր բորդ՝ մասնագիտական խումբ, որը որոշում է բուժման ամենարդյունավետ ընթացքը տվյալ հիվանդի համար: Թումոր բորդում ընդգրկվում են օնկովիրաբույժը, քիմիոթերապևտը, ճառագայթաբանը, մորֆոլոգը և հյուսվածքաբանը (հիստոլոգ), որոնք ելնելով հետազոտությունների տվյալներից, հիվանդի առողջական վիճակից, քաղցկեղի փուլից՝ պլանավորում են բուժումը:
Քաղցկեղի բուժումը Հայաստանի Հանրապետությունում անվճար է, և հիվանդը կարող է բուժվել իր նախընտրած բժշկական կենտրոնում: Բայց անկախ դրանից, մարդիկ պետք է հետևողական լինեն իրենց առողջության պահպանման հարցում ու չկանգնեն բարդ վիրահատության անհրաժեշտության առաջ: Արտասահմանում գործում են քաղցկեղի վաղ հայտնաբերման սքրինինգային ծրագրեր: Հայաստանում նման ծրագրեր չեն գործում, բայց պոլիկլինիկաներում պարբերաբար անվճար հետազոտություններ կարող են անցնել բոլորը:
Հատկապես 50 տարեկանից հետո պարբերաբար հետազոտվելը պետք է դառնա յուրաքանչյուրի համար պարտադիր սկզբունք, որովհետև հենց այդ տարիքից է մեծանում քաղցկեղների առաջացման հավանականությունը: Վաղ հայտնագործված քաղցկեղը ենթադրում է ավելի թեթև վիրահատական միջամտություն ու ավելի երկար ապրելիություն: Սեփական առողջության հանդեպ պատասխանատվության զգացումը քաղցկեղի արդյունավետ բուժման լավագույն նախապայմանն է: Ինքը բժիշկ Սահակյանն էլ ամեն տարի հետազոտվում է, ու խորհուրդ տալիս բոլորին՝ հետազոտվել ու վարել առողջ ապրելակերպ: