Վազգեն Մանուկյանն ի՞նչ է՝ կոռուպցիոնե՞ր է, թալանչի՞ է, հայրենասեր չէ՞, անգրագե՞տ է. Վանեցյանը մեկնաբանել է, թե ինչու է ընտրվել հենց Վազգեն Մանուկյանը
Անթերի մարդ չկա, բայց Վազգեն Մանուկյանն ի՞նչ է՝ կոռուպցիոնե՞ր է, թալանչի՞ է, հայրենասեր չէ՞, անգրագե՞տ է: Ի՞նչ է Վազգեն Մանուկյանը: Այս մասին այսօր ճեպազրույցում ասաց «Հայրենիք» կուսակցության ղեկավար Արթուր Վանեցյանը՝ ի պատասխան «1-ին ալիքի» լրագրողի հարցին, թե արդյոք Վազգեն Մանուկյանն այն թեկնածո՞ւն է, ում այս անցումային փուլում ժողովուրդը կարող է վստահել:
«Վազգեն Մանուկյանը մի մարդ է, ով եղել Հայաստանի երրորդ հանրապետության առաջին վարչապետը, եղել է «Ղարաբաղ կոմիտեի» ղեկավարը, մի մարդ է, ով բանակաշինության մեջ ունեցել է ամենամեծ լուման: Այսինքն՝ երբ որ կային կամավորականների ջոկատներ, Վազգեն Մանուկյանի պաշտպանության նախարար դառնալուց հետո, բանակը դարձել է կանոնավոր բանակ, ունեցել ենք Զինված ուժեր»,- ասաց Վանեցյանը:
Հարցին, թե նա այս պահին այն մարդն է, ով կարող է բանակցային սեղանին նստե՞լ:
«Միանշանակ, Վազգեն Մանուկյանն իր անցած ճանապարհով և ունեցած փորձով կարող է նստել բանակցային սեղանի շուրջ և լուծել Հայաստանի առջև ծառացած այն դժվարագույն խնդիրները, որոնց մեջ հիմա մենք հայտնվել ենք»,- ասաց Վանեցյանը:
Նա նշեց, որ քիչ անց կլինի հայտարարությունը, որում նշվում է, որ մեկ տարի անց կանցկացվի արտահերթ խորհրդարանական ընտրություն, որին Մանուկյանը չի մասնակցի և որևէ ուժի չի սատարի: