Արման Բաբաջանյանը շատ ծանր է տարել Արթուր Ասատրյանի արդարացումը. փաստաբան
Արթուր Ասատրյանի փաստաբան Գեղամ Հակոբյանի մեկնաբանությունը.
Դիտելով Արման Բաբաջանյանի ելույթը, ցանկանում եմ անդրադառնալ դրան՝ պատգամավորն անհասկանալի դրդապատճառներով, ակնհայտ վիրավորում և զրպարտում է ինչպես Արթուր Ասատրյանին, այնպես էլ ամբողջ դատական համակարգին։
Բաբաջանյանը, չհանդիսանալով դատավարության մասնակից, ցանկանում է ճնշում գործադրել դատական իշխանության նկատմամբ, հատկապես վերադաս ատյանների։ Դատելով տեսանյութից, Արման Բաբաջանյանը շատ ծանր է տարել Արթուր Ասատրյանի արդարացումը, այն պարագայում, երբ չի հանդիսացել դատավարության կողմ, առավել ևս տուժող։ Թե ում պատվերն է կատարում դեռևս հասկանալի չէ, քանի որ Արթուր Ասատրյանի դեմ նրա ակնհայտ ագրեսիան բոլորովին այլ բանի մասին է խոսում։
Ինչ վերաբերում է Արթուր Ասատրյանին քրեաօլիգարխիա կամ հանցագործ որակելուն, ապա պետք է փաստենք, որ Ասատրյանը նախկինում երբևէ դատապարտված չի եղել, բացառապես զբաղվել է գործարարությամբ, Հայաստանի Հանրապետություն՝ բացի գումար բերելուց և բարեգործական ծրագրեր իրականացնելուց, որևէ գործունեություն չի իրականացրել, որևէ կլանի անդամ չի եղել, առավել եւս քրեական ենթամշակույթի որևէ աստիճանակարգ չի ունեցել, իսկ այս քրեական գործով մեղադրանքը վերաբերում է նրան սպանել ցանկացող անձանց բացահայտելուն։ Մինչդեռ, նույն տեսանյութում Արման Բաբաջանյանը տեղեկություն է հայտնում իր իսկ դատվածության և տարիներով ազատազրկման ձևով պատիժ կրելու մասին։ Նա ասում է, թե իբր իր ձեռքի տակ է մեղադրական եզրակացության համառոտ բովանդակությունը՝ բոլոր ապացույցներով, եւ պնդում է, թե այս գործով Արթուր Ասատրյանը չէր կարող արդարացվել եւ նրա հանցանքը վկայող բազմաթիվ ապացույցներ կան․․
Նախ մեղադրական եզրակացությունը և գործով առկա ապացույցները Արման Բաբաջանյանի ձեռքի տակ հայտնվելու հանգամանքը խիստ կասկածելի է, այն պարզ պատճառով, որ նա չի հանդիսացել դատավարության կողմ կամ մասնակից և որևէ առումով չի մասնակցել դատաքննությանը ու դռնբաց դատական որևէ նիստի ներկա չի գտնվել, հետևաբար նա չէր կարող տիրապետել դատաքննությամբ հետազոտված այն ապացույցներին, որոնք որևէ այլընտրանք չէին կարող թողնել որևէ դատավորի՝ Արթուր Ասատրյանին այդ մեղադրանքով արդարացնելու առումով։ Ակնհայտ է, որ Արման Բաբաջանյանի վիրավորական և զրպարտչական տեսանյութը թաքնված նպատակ ունի՝ քաղաքական իշխանությանը սադրելով, վերադաս դատական ատյանների նկատմամբ ակնհայտ ճնշում գործադրելու միտում է հետապնդում, որով հավանաբար փորձ է արվում ծառայել այն ուժերին, որոնք ի սկզբանե նախաձեռնել էին Արթուր Ասատրյանին ազատությունից զրկել և կանգնած են այս հորինված քրեական գործի ակունքներում։
Հորդորում եմ Արման Բաբաջանյանին՝ նույն Յութուբ կայքի միջոցով ներողություն խնդրել վիրավորանքների համար և հերքում պարունակող տեսանյութ տեղադրել նույն կայքում։ Նաեւ հերքել այն տեղեկությունը, թե իբր Ա․ Ասատրյանը հանդիպում է խնդրել իր հետ և ակնկալել իր բարյացակամությունը։
Որպեսզի հանրության համար պարզ լինի իրականությունը, ստիպված եմ նաև համառոտ ներկայացնել որոշ հանգամանքներ, թե ինչու չէր կարող կայացվել այլ դատական ակտ։ Մեղադրանքի հիմքում որպես առանցքային ապացույցներ դրված էին 3 «տուժողների» ցուցմունքները և նախկին ոստիկանապետ Վլադիմիր Գասպարյանի ցուցմունքը։ Նշեմ, որ չնայած մեր բազմաթիվ միջնորդություններին, նախաքննության ընթացքում տուժող ճանաչված անձինք չեն առերեսվել Արթուր Ասատրյանի հետ, Ասատրյանը նրանց նաեւ ճանաչման չի ներկայացվել և դատարանում, տեսնելով Արթուր Ասատրյանին, նրանք միաբերան հայտարարեցին և հստակ պնդեցին, որ դահլիճում գտնվող անձին՝ Արթուր Ասատրյանին տեսնում են առաջին անգամ և նա հաստատապես իրենց առևանգած անձը չէ։ Իսկ նախկին ոստիկանապետ Վլադիմիր Գասպարյանը դատարանում հայտնեց, որ Արթուր Ասատրյանը որևէ առևանգում չի կատարել և նրա հետ ինքն իրականացրել է զուտ օպերատիվ, տակտիկական անհրաժեշտ զրույցներ՝ պարզելու համար նրա կողմից մարդկանց առևանգում կատարվե՞լ է, թե՞ ոչ և համոզվել է, որ նա առևանգում չի կատարել:
Որևէ այլ ապացույց գոյություն չունի և Արթուր Ասատրյանի վերաբերյալ կայացված դատական ակտը հիմնված է բացառապես դատաքննությամբ ձեռք բերված և հետազոտված ապացույցների վրա։