Եթե բան չի փոխվելու, կհանենք մեր երեխաների դիակներն ու էստեղ կշարենք․ թող ես դրանից հետո մեռնեմ, բայց ուրիշ ճար չունեմ․ սպանված զինվորի մայր (տեսանյութ)
Էդ ո՞նց եղավ, որ հենց մահացած զինվորի դիակը բերեցին, երկու րոպեի ընթացքում հոդված փոխեցին՝ ինքասպանությունը դարձրեցին սպանություն, ուրեմն կարող է, չէ՞, հրաման տալ, որ էս բոլոր սպանված զինվորների գործերը բացահայտվեն։ Այդ մասին NEWSPRESS.am-ի հետ զրույցում ասաց խաղաղ պայմաններում զոհված զինվոր Արսեն Մխիթարյանի հայրը՝ Արթուր Մխիթարյանը, ով իր տիկնոջ՝ Լուսինե Մխիթարյանի հետ միասին եկել ու միացել էր կառավարության դիմաց բողոքի ակցիա կազմակերպած սևազգեստ մայրերին՝ պահանջելով իրենց որդիների սպանությունների գործերի բացահայտումները։
Ծնողներից մահացած զինվոր Վալերիկ Մուրադյանի մայրն էլ՝ Նանա Մուրադյանը, հավելում է Արսենի հոր խոսքը․
«Եթե բան չի փոխվելու, այսքան ծնողներս հանելու ենք շիրիմներից մեր երեխաներին ու բերենք դիակներն այ էստեղ շարենք․ թող ես ցավ ապրեմ, թող դրանից հետո մեռնեմ, բայց ուրիշ ճար չունեմ․ դա է իմ վերջին քայլը»,- ասաց տիկին Նանան։
Իսկ Արսենի մայրը՝ Լուսինե Մխիթարյանն էլ նկատեց, որ շատերն են իրենց ուժերն ու գումարները ներդնում՝ իրենց որդիներին բանակից ազատելու համար, իսկ իրենք, բժշկականում սովորող իրենց մինուճար որդուն ուղարկել են բանակ, ու այսօր մնացել ձեռնունայն։
«Իմ Արսենի պես տղուն ուղարկեցի բանակ, որ խփեն ու բերեն դնեն դե՞մս․ ես չգիտեմ՝ թուրքն ա խփել, թե թուրք-հայն ա խփել»,- ասում է թաց աչքերով կինն ու նկատում, որ տղային բանակ ճանապարհելիս «դուխ է տվել» ու խոստացել, որ լավ կնայեն որդուն։
«Ես իմ տղային խաբեցի»,- ասաց Լուսինե Մխիթարյանը։
Մանրամասները՝ տեսանյութում