Իմքայլական պատգամավորի միջնորդությամբ բացված կարի արտադրամասում խաբե՞լ են. 150 աշխատող աշխատավարձ չի ստանա
Լոռիի մարզի Ալավերդի քաղաքում նոյեմբերի սկզբին մեծ շուքով ու աղմկով բացվեց «Կոտտոնի» կարի արտադրամասը: Այսօր արդեն «շուքը» անցել է, իսկ աղմուկը` մնացել: Նոյեմբերի 11-ից իրենց աշխատանքն այս արտադրամասում իրականացնող բանվորները դեռևս աշխատավարձ չեն ստացել: Դեկտեմբերի 27-ին էլ համբերության բաժակը լցվել էր ու բողոքի ակցիա են իրականացրել։
Արդյունքում ընկերության համասեփականատեր Կարեն Դասոյանը բանվորներին խոստացել է, որ դեկտեմբերի 30-ին, ժամը 16:00-ին կհանդիպեն և ինքը, «մեծահոգաբար», այդ մարդկանց մի քիչ գումար կտա:
Արտադրամասում աշխատում է 150 մարդ, ովքեր չեն հավատում Դասոյանի խոտումներին: NEWSPRESS.am-ի հետ զրույցում աշխատողներից մեկն ասաց, որ ի սկզբանե իրենց հետ ոչ ոք ոչ մի գումար չի պայմանավորվել:
«Երևի մեր միակ սխալը դա էր, որ պայմանագիր չենք կնքել»,- ասաց մեր զրուցակիցը: Նրա խոսքով՝ երբ աշխատավարձի ժամանակը եկել է, ասել են, որ մինիմալ աշխատավարձի չափով են գումար տալու, սակայն պարզվել է, որ մինիմալը, արտադրամասի տնօրինության համար, 40 000 դրամն է եղել: Տեսնելով, որ աշխատողները դժգոհում են և պնդում, որ մինիմալն այնուամենայնիվ 55000 դրամն է, ու գոնե այդչափ գումար պետք է տան իրենց, ուստի տնօրինությունը, ինչ-որ անհեթեթ պատճառաբանումներով, հայտարարել է, թե միայն այս ամիս կլինի 40 000, իսկ հետո կվերանայեն ու կբարձրացնեն: Սակայն 1.5 անց պարզվել է՝ անգամ այդ գումարն էլ չեն ուզում վճարել` հիմա էլ պատճառաբանելով, թե «ֆուռերը տեղ չեն հասել»:
«Ի՞նչ կապ ունի` ֆուռը հասել ա-չի հասել, կարող ա էդ ֆուռը ճանապարհին շրջվում ա... ի՞նչ ա, մեզ ընդհանարպես փող չե՞ն տալու: Մենք մեր կատարած աշխատանքի տերն ենք»,- նկատեց մեր զրուցակիցը:
Ամեն դեպքում, արտադրամասի բանվորների համար ամենևին էլ հուսադրող չէ Դասոյանի խոստումը, թե իրենց մի քիչ գումար կտա. նախ, վերջինս յուրաքանչյուրին 20-30 000 դրամ է խոստացել, հետո էլ նրա համբավը վստահություն չի ներշնչում:
Մեր տեղեկություններով՝ Դասոյանը Ձորագեսում ևս մեկ կարի արտադրամաս է ունեցել, որտեղ «կուրտկաներ» են կարել: Նա աշխատողներին 1 ամսվա համար տվել է 15-25 հազար դրամ աշխատավարձ: Ու հիմա բանվորներն անհանգստացած են` եթե նա այդ սկզբունքով պետք է վարձատրի նաև այս դեպքում, ապա դա նույնիսկ իրենց ճանապարահածախսը չի կարող հանել:
Բացի այդ, աշխատավարձերի հետ կապված մամուլում, աշխատողների համար, «հեքիաթային» թվեր են ներկայացվում` ընդհուպ մինչև 150-200 հազար դրամ: Այս մասին խոսելիս` մեր զրուցակիցը ծիծաղեց. «Էս ինչ հեքիաթներ են, ամենքը մի բան են գրում, նայում ենք ու ապշում: Էդ թվերի մեջ վերջին 0-ները ավել են»:
Գիտի՞ այս խաբեության մասին երկրի ղեկավարը, թե՞ ոչ, պարզ չէ: Համենայնդեպս ասում են, որ արտադարամասի բացման արարողությանը հրավիրված է եղել, բայց չի եկել: Երևի նա ի սկզբանե արտադրամասի ճակատագիրը կանխորոշել էր...
Ինչևէ...
Հարկ է նշել, որ կարի արտադրամասի համար միջնորդել ու հետո դրա «փիարով» զբաղվել է ԱԺ «Իմ քայլը» խմբակցության պատգամավոր Արեն Մկրտչյանը: Նա բացման օրերին չէր դադարում երևալ էկրանին: Նկարվում ու հանդես էր գալիս ամպագոռգոռ խոստումներով, թե այս արտադրամասը Ալավերդու տնտեսության համար վերելք կարող է հանդիսանալ, և որ նմանատիպ այլ ծրագրեր ևս կան...
Թե ինչու այս օրերին նույն ոգևորությամբ իմքայլական պատգամավորը չի երևում էկրանին` կարելի է ենթադրել: Ակնհայտ է նաև, որ «նոր Հայաստանում», նոր հույսերով լցված 150 ընտանիք, Ամանորի շեմին կանգնել է խնդրի առաջ ու սպասում է իր տարածքից ընտրված ու իրենց աշխատանքի համար երաշխավորած պատգամավորի «բեմելին»... նրանք չեն ուզում հավատալ, որ խաբվել են: