Փաշինյանը մարշալ Ժուկովն է, Բեռլինը գրավել է, մնացածն էլ ուզում են հող հանձնել. աբսուրդային հայտարարությունների տարի (տեսանյութ)
Անցած տարին աբսուրդային հայտարարությունների տարի էր։ Այս մասին լրագրողների հետ զրույցում ասաց ՀՀԿ մամուլի խոսնակ Էդուարդ Շարմազանովը:
Այդ հայտարարությունների շարքը Շարմազանովն սկսեց Իրանում օտարերկրյա գործակալների վերաբերյալ Նիկոլ Փաշինյանի կողմից արված հայտարարությամբ։
«Անցել է մեկ տարի, և նա չի տվել որևէ օտարերկրյա գործակալի անուն, ավելին՝ անվտանգության մարմինները չեն հայտնաբերել և չեն վնասազերծել որևէ օտարերկրյա գործակալի: Սա ուղղակի խայտառակություն է, երբ պետության ղեկավարը հայտարարում է, որ կան քաղաքական գործիչներ, որոնք զբաղված են օտարերկրյա գործակալ լինելով, այդ ամբողջ մեկ տարվա ընթացքում գոնե մեկ գործակալ բացահայտված չէ: Սա խոսում է կամ պետության ղեկավարի հայտարարությունների անլուրջ, ջրիկ լինելու մասին, կամ էլ պետական համակարգի անմեղսունակ լինելու մասին»,- ասաց Շարմազանովը:
Երկրորդ աբսուրդային հայտարարությունը, Շարմազանովի դիտարկմամբ, կապված է Արցախում դավադիր ուժեր փնտրելու հետ։
«Դավադիր ուժեր ասելով՝ Փաշինյանը նկատի ունի այն ուժերին, որոնք ժամանակին հող են ազատագրել: Իմ մոտ տպավորություն է, որ ինքը իբր մարշալ Ժուկովն է, Բեռլինը գրավել է, մնացածն էլ ուզում են հող հանձնել»,- ասաց Շարմազանովը:
Երրորդ աբսուրդային հայտարարությունը Շարմազանովը համարում է Փաշինյանի սեպտեմբերի 2-ին արած հայտարարությունը։
«Վարչապետը լայվ մտավ ու շտապեց զարմացնել ողջ աշխարհին ու զարմացրեց, ասելով, որ Լեռնային Ղարաբաղը 1991 թվականի սեպտեմբերի 2-ին անկախացել է Խորհրդային Ադրբեջանից: Թան չէ, փրթած մածուն: Սովետական Ադրբեջանից Ղարաբաղն անջատվել է 1988 թվականի փետրվարի 20-ին և հուլիսյան որոշումներով»,- ասաց Շարմազանովը:
Նա նկատեց, որ աբսուրդային հայտարարությունները շատ են՝ Հռոմի պապը ես եմ, Հիսուս Քրիստոսի հետ և այլն։
Մանրամասները՝ տեսանյութում