Չբանակցելու պատճառը հայտնի է
ՀՀ վարչապետ Նիկոլ Փաշինյանը Բրյուսել կատարած այցի ընթացքում ոչ ֆորմալ կարճ հանդիպում է ունեցել Ադրբեջանի նախագահ Իլհամ Ալիևի հետ: «Ես և պարոն Ալիևն ընթրիքի ընթացքում կարճ զրույց ունեցանք: Դա ընդհանուր խոսակցություն էր Լեռնային Ղարաբաղում ընթացիկ իրավիճակի վերաբերյալ»,- հանդիպման հետ կապված՝ ասել է վարչապետը:
Ավելի ուշ վարչապետի խոսնակը մանրամասներ էր հայտնել այդ հանդիպումից․
«Ասեմ, որ դա պաշտոնական միջոցառում էր, որը կազմակերպվել էր ի պատիվ Արևելյան գործընկերության երկրների։ Այո', մի սեղանի շուրջ էին գտնվում ՀՀ վարչապետն ու Ադրբեջանի նախագահը։ Տեղի է ունեցել կարճ շփում, քննարկել են ստեղծված իրավիճակը շփման գծում։ Այսինքն՝ մտքերի փոխանակում իրավիճակի վերաբերյալ»,- ասել էր Կարապետյանը։
Հարցին, թե անդրադարձ եղե՞լ է սահմանային վերջին դեպքերին, Վլադիմիր Կարապետյանը պատասխանեց, որ մտահոգությունը փոխանցվել է։
Ստացվում է՝ հերթական անգամ Հայաստանի և Ադրբեջանի նախագահները հանդիպել են և չեն քննարկել Արցախյան հարցը, որը հեղափոխությունից հետո հայտնվել է փակուղում։
Փաշինյանն ամեն կերպ խուսափում է Ալիևի հետ հստակ օրակարգով հանդիպումներից, սահմանային իրավիճակը վերջին շրջանում լարված է, իսկ Ալիևը Եվրամիության հետ մտածում է լուրջ ռազմավարական համագործակցություն ստորագրելու մասին և պահանջում, որ տարածքային ամբողջականության հարցով բոլոր ձևակերպումները բխեն իր շահերից։
Ստեղծված իրավիճակում Հայաստանի ղեկավարը պարտավոր էր բարձրացնել Արցախյան հարցի հետ կապված հարցադրումներ, նա չի անում դա արդեն տևական ժամանակ, ինչը հիմք է տալիս ենթադրելու, որ նման ոչ ֆորմալ հանդիպումներն ունեն ընդամենը մեկ նպատակ՝ որքան հնարավոր է՝ հետաձգել սանձազերձվող պատերազմն Ադրբեջանի կողմից։
Նիկոլ Փաշինյանն էլ ժամանակ է շահում՝ մինչ Հայաստանը կա՛մ կպատրաստվի դիմադրել Ադրբեջանի հերթական ագրեսիային, կա՛մ կլինի նախահարձակ։
Սրանք ենթադրություններ են, որոնց պատճառը Արցախի խնդրով բանակցությունների փակ բնույթն է, թեև իշխանության գալուց առաջ հնչեցվում էին Սերժ Սարգսյանից առավել հրապարակային աշխատելու հավաստիացումներ։
Հեղափոխական մոտեցումներ՝ Փաշինյանն այս կարևորագույն և լուրջ խնդրում չի կարողանում կիրառել, այլ ընդամենը շարունակում է մինչ այս գործող ձևաչափը՝ բացառությամբ մեկ տարբերության․ նախկինում Ալիևի հետ բանակցում էին, իսկ հիմա նստում մի սեղանի շուրջ և ընդամենը զրուցում։
Իսկ բանակցության բացակայությունը պատերազմի սկիզբն է։
NEWSPRESS.am