Շախ և մատ՝ նոր Հայաստանի հին դատախազին
ՀՀ Գլխավոր դատախազ Արթուր Դավթյանն այսօր խորհրդարանում էր․ մայիսի 8-ին ներկայացրել էր դատախազության տարեկան զեկույցը, իսկ այսօր պատասխանում էր պատգամավորների հարցերին։
Ինչպես խորհրդարան ներկայացող բոլոր բարձրաստիճան պաշտոնյաներին, այնպես էլ Արթուր Դավթյանին, իշխող մեծամասնության՝ «Իմ քայլի» պատգամավորները որևէ լուրջ հարց չկարողացան տալ։
Նրանց հարցերի շրջանակը պտտվում է «թավշյա հեղափոխությունից առաջ էր Ձեզ համար հեշտ աշխատելը, թե հետո, և արդյո՞ք նախկին պաշտոնյաները Ձեզ խնդրում են մեղմ գտնվել նրանց նկատմամբ հարուցված քրեական գործերի շուրջ» թեմաների շրջանակում։
«Իմ քայլի» պատգամավորները Արթուր Դավթյանին որևէ սուր հարցադրում չներկայացրին, ինչը ժամանակին անում էր ընդդիմադիր պատգամավոր Նիկոլ Փաշինյանը։
Ստեղծվել էր տպավորութոյւն, որ Արթուր Դավթյանը թավշիստների նման նոր է՝ նոր համակարգի ծնունդ և որևէ հակադրություն նորի ու հնի միջև՝ չկա։ Այսպես բարիդրացիական և փոխադարձ ջերմ մթնոլորտում կավարտվեր Ազգային ժողովի քառօրյայի վերջին օրը, եթե ամբիոնին չմոտենար «Լուսավոր Հայաստան» խմբակցության պատգամավոր Արման Բաբաջանյանն ու չփչացներ գլխավոր դատախազի օրը։
Հենց նա Արթուր Դավթյանին հիշեցրեց կոռուպցիայի կանխարգելման, դա բարոյապես մերժելու նրա խորհուրդները՝ դրան հակադրելով Արթուր Դավթյանի ստեղծած իրականությունը։
«Արդյոք կոռուպցիա չէ՞ այն փաստը, որ Գլխավոր դատախազության տեղեկատվական տեխնոլոգիաների և անվտանգության վարչության պետի պաշտոնում նշանակել եք Ձեր զարմիկին, արդյոք կոռուպցիա չէ՞ այն փաստը, որ 2017 թ․ Լոռու մարզի դատախազ եք նշանակել Ձեր սանիկին, արդյոք կոռուպցիա չէ՞, որ 2016 թ․Լոռու մարզի դատախազ եք նշանակել Ձեր սանիկին, արդյոք կոռուպցիա չէ՞, որ Ձեր մտերիմին նշանակել եք Արարատի դատախազ, արդյոք կոռուպցիա չէ՞, որ պետությունից ծախսել եք 14 մլն դրամ, կառուցել եք վերելակ, որն ուղիղ գնում է Ձեր աշխատասենյակ»։
Արման Բաբաջանյանը Արթուր Դավթյանին հիշեցրեց նաև նրա ունեցած կես միլիոն դոլար արժողությամբ տան մասին՝ վերջանականապես նրան ոչնչացնելով որպես պետական պաշտոնյա․ որովհետև ՀՀ պետական պաշտոնյան երբևէ չի կարող ստանալ այնքան աշխատավարձ, որ կարողանա կառուցել այդ արժողությամբ առանձնատուն։
Արթուր Դավթյանն, իհարկե, նշեց, որ խորհրդարանում մշտապես քննադատվել են Գլխավոր դատախազության զեկուցները, բայց այն, որ Բաբաջանյանի հարվածն իր ու իր վարկանիշի համար կործանարար եղավ, խոստովանեց իր լռությամբ․ նա Բաբաջանյանի ներկայացրած որևէ փաստ չհերքեց։
Այսօր ընդդիմադիր պատգամավորն արեց այն, ինչ պարտավոր էր անել իշխանությունն ու նրա ղեկավարը․ եթե նախորդ համաարգն արատավոր էր ու մերժելի, ուրեմն պետք է մերժվեր նաև այդ համակարգի կարկառուն ներկայացուցիչներից մեկը՝ Դավթյանը, ինչը չի արվել, ավելին՝ նա շարունակու է իր կարիերայի վերելքը՝ իշխանության ղեկավարի թողտվությամբ։ Փաստորեն, սին են այն հավաստիացումները, որ մենք ապրում ենք նոր Հայաստանում, երբ առանցքային պոստերում հին առանցքային դեմպերը շարունակում են իրենց առաջընթացը։
NEWSPRESS.am