Փաշինյանը չի հիշում՝ ինչպես է զենքը հանձնել ոստիկանություն․ մանրամասներ՝ «Ելք»-ի և Մանախի միջև ընդհարման մասին
ՀՀ վարչապետ Նիկոլ Փաշինյանն այսօր` ապրիլի 3-ին, որպես վկա հրավիրվել է Երևանի ընդհանուր իրավասության դատարանի Շենգավիթի նստավայր՝ Արթուր Այվազյանի` Մանախի և «Ելք»-ի համակիրների ընդհարման գործով ցուցմունք տալու համար։
Նա դատական նիստի ժամանակ հայտարարեց, որ ճանաչում է տուժող Հայկ Սարգսյանին, ով 2017 թվականի խորհրդարանական ընտրությունների ժամանակ իրենց նախընտրական շտաբի պետն է եղել։ Ավելին՝ Հայկի հետ Փաշինյանն ընկերական հարաբերություններ է ունեցել։
Իսկ Արթուր Այվազյանի հետ կապված` Փաշինյանն ասած, որ առաջին անգամ է հանդիպում նրան, թեև ԱԺ պատգամավոր եղած ժամանակ Այվազյանից նամակներ է ստացել։
Փաշինյանը պատմեց նաև մանրամասներ տեղի ունեցածի մասին։
«2017 թվականին այդ օրը ես տանն էի։ Երեկոյան 22։00-ի կողմերն էր, երբ զանգել են ինձ ու ասել, որ մեր տղաների վրա հարձակում է տեղի ունեցել։ Որքանով հիշում եմ, զանգահարողը ներկայումս ԱԺ փոխնախագահ Ալեն Սիմոնյանն էր։ Փորձեցի Հայկին զանգել, չպատասխանեց, հետո, եթե չեմ սխալվում, Ալենի միջոցով ասացի՝ թող ինձ զանգեն: Զանգեցին ու ասացին, որ միջադեպ է եղել, ես ասացի` արագ տարածքից հեռացեք ու եկեք նախընտրական շտաբ: Անմիջապես տանից դուրս եմ եկել, տեսել, որ իմ նկարի վրա ներկ են փչել: Ինձ պատմեցին, որ երբ շենքից իջել են, տեսել են, որ մեքենայի վրա ամրացված դրոշը չկա, ու հարցրել են՝ ո՞ւր է դրոշը, ո՞վ է տարել: Մի քանի քաղաքացիներ են եղել, ու նրանցից մեկն ասել է` տղաները հետ են պահանջել դրոշը: Դրոշը տանող քաղաքացիներից մեկը կամ քաղաքացին հարվածել է Հայկ Սարգսյանին։ Բնականաբար, մեր ժողովուրդը միջամտել է, հետո այդ անձը հանել է զենքը, ու հենց այդ պահին ներկաներից մեկն արագ արձագանքել է, խփել է նրա ձեռքին, ու զենքն ընկել է։ Երբ ես իմացել եմ, որ զենքն իրենց մոտ է, ասել եմ՝ ցույց տվեք: Ես զենքը վերցրել եմ` առանց դիպչելու, անմիջապես ահազանգել եմ ոստիկանություն, հետո «Ֆեյսբուք»-ով ուղիղ եթեր եմ մտել ու ցուցադրել զենքը, ցուցադրել՝ ինչ է տեղի ունեցել շարժական շտաբի հետ»,- մանրամասնեց նա։
Փաշինյանի խոսքով` Հայկ Սարգսյանն այդ օրը ուղիղ եթերում չի եղել, քանի որ վնասվածքներ ուներ։
Չնայած ներկայացրած այս մանրամասներին՝ Փաշինյանը հստակ չհիշեց, թե ինչպես է ինքը զենքը հանձնել ոստիկանություն։
«Ես տեսա, որ զենքի մեջ մարտական փամփուշտներ կային և հետագայում չեմ հիշում, թե ոնց եմ զենքը հանձնել ոստիկանություն։ Եթե չեմ սխալվում՝ ոստիկանությունը ոնց որ չեկավ Տերյան հասցե: Ես գնացի դեպքի վայր, հետո Մալաթիայի բաժին ու, եթե չեմ սխալվում, այնտեղ եմ զենքը հանձնել», - ասաց նա, որից հետո լքեց դատարանի դահլիճը:
Հիշեցնենք, որ 2017 թվականի մարտի 31-ին զինված հարձակում էր տեղի ունեցել «Ելք» դաշինքի վստահված անձանց վրա։ Նույն օրվա գիշերը «Ելք» դաշինքի կողմնակիցների ու Մանախի միջև տեղի էր ունեցել ընդհարում: «Ելք» դաշինքի շտաբի ներկայացուցիչ Հայկ Սարգսյանը ճանաչվել էր տուժող: Հարուցվել էր քրեական գործ, որի շրջանակներում Այվազյանին մեղադրանք էր առաջադրվել խուլիգանության (ՀՀ քրեական օրենսգիրք 258-րդ հոդվածի 2-րդ մաս) և ապօրինի զենք պահելու (235-րդ հոդվածի 1-ին մաս) համար: