Փաշինյանը չի ուզում գահավիժել. ինչու Լևոն Տեր-Պետրոսյանն «ուրացավ»
Օրերս հրապարակվեց ՀՀ առաջին նախագահ Լևոն Տեր-Պետրոսյանի «սրտաճմլիկ» տեքստը այն մասին, թե ինքը Նիկոլ Փաշինյանի հետ, մեղմ ասած, կապ չունի: Նա իր հայտարարության մեջ նշել էր առնվազն 5 կետ, որոնք խոսում են իր և Փաշինյանի մտերմության մասին և հերթով «ուրանում» դրանք: Մնում էր՝ ասեր՝ «Ի՞նչ Փաշինյան, Նիկո՞լն ով է»...
«Արտաամուսնական կապերի» մասին լուրերը «չեզոքացնելու» համար, Լևոն Տեր-Պետրոսյանն իր տեքստում օգտագործել էր իր ամբողջ բառամթերքը. Է՛լ «հերյուրանք», է՛լ «մոգոնված», է՛լ «կատարյալ անհեթեթություն», է՛լ «քաչալ շուն», է՛լ «գող փիսո»…
Այս որակումներն ուղղված էին մարդկանց, ում «ճիգերով», իբր, դաշտ են նետվել իր և Փաշինյանի հարաբերությունների մասին լուրերը: Իսկ ավելի կոնկրետ՝ Լևոն Տեր-Պետրոսյանը սլաքներն ուղղել էր նախկին իշխանությունների վրա և նրանց անվանել չարախոսներ...
Սա, իհարկե, տրամաբանական «ռեակցիա էր»...
Տեր-Պետրոսյանը, որպես թրծված քաղաքական գործիչ, պարտավոր էր և պատասխանեց իր մասին դաշտ նետված տեղեկատվությանը, բայց քանի որ ո՛չ իրեն ու ո՛չ էլ հատկապես Փաշինյանին տհաճ անակնկալներ պետք չեն, ուստի տրամաբանական է նաև այն, որ Տեր-Պետրոսյանն, ի պատասխան շրջանառվող լուրերի, չէր հայտարարի, թե հա՛, ճիշտ է, իր ու Նիկոլի հարաբերություններն ունեն տարիների պատմություն ու իրենց կապն անքակտելի է, որ իրենց հայացքները Ղարաբաղի հիմնախնդրի կարգավորման հարցում նույնն է, որ կոնգրեսականները Նիկոլի կողմից պաշտոններ են ստանում, որ Նիկոլը շատ հաճախ իրենից խորհուրդներ է հարցնում և որ, առհասարակ, Նիկոլն իր հոգեզավակն է…
Իհարկե, ՀՀ առաջին նախագահը կարող է հերքել, պաշտպանվել՝ պաշտպանելով իր «խնամյալին», քանի որ, ինչպես նկատեցինք, գոնե այս շրջափուլում, նա այլընտրանք չունի. եթե խոստովաներ ու «օրինակացներ» իր և Փաշինյանի կապը, ապա, նիկոլապաշտ հասարակությունից գուցե մի հոծ զանգված ուրանար Փաշինյանին՝ հասկանալով, որ «դարձ են եղել» դեպի շատ հին, նոր անկախություն ձեռք բերած Հայաստան:
Մյուս կողմից էլ, ինչ էլ որ ասի Տեր-Պետրոսյանը, բոլորին է հայտնի, որ տարիներ շարունակ Նիկոլ Փաշինյանը եղել և միգուցե նաև մնում է նրա բարձրախոսը: Նրանց գործընկերային հարաբերությունները թեև այսօր ֆորմալ բնույթ չեն կրում, սակայն նրանք գաղափարակիցներ են և գտնվում են նույն տիրույթում:
Գուցե իրենց հարաբերություններն արտաքուստ «սառը» կամ այդպիսին ցույց տվող Լևոն Տեր-Պետրոսյանի ներքին ձայնն իրականում գոռում է ու ցանկանում բարձրաձայնել «անթաքույց սիրո և կապի» մասին, բայց հանգամանքները թույլ չեն տալիս ու նրանք դեռ պատրաստ չեն հարաբերությունների օրինականացմանը, քանի որ դա ռիսկային կլինի:
Լևոն Տեր-Պետրոսյանի վարկանիշը հասարակության շրջանում ոչ թե ընկել, այլ գահավիժել է անդունդ: Այս պահին, երբ Փաշինյանի վարկանիշը ևս չի փայլում, կնքահոր և հոգեզավակի ակնհայտ կապը կարող է արագացնել Փաշինյանի հեղինակության անկումը... Սա ավելորդ գլխացավանք է, որին Փաշինյանը դեռ պատրաստ չէ. նա չի ուզում արագ գահավիժել...
Ա.Սահակյան