Մամիկոն Ասլանյանը դուխով քայլ է անում Մարուքյանի վրայով
Վանաձորի քաղաքապետ Մամիկոն Ասլանյանը մի շատ հետաքրքիր գրառումով է հանդես եկել, որտեղ բավականին սուր քննադատության է արժանացրել իր՝ «քաղաքական ոխերիմ թշնամիններին», մասնավորապես՝ Էդմոն Մարուքյանին, ով Երևանի քաղաքապետ Տարոն Մարգարյանի հրաժարականից հետո, ֆեյսբուքյան իր էջում գրել էր. «Երևանի քաղաքապետը հրաժարական տվեց... հերթը Վանաձորի քաղաքապետինն է»:
Մամիկոն Ասլանյանը գրառումը ներկայացնում ենք ստորև առանց որևէ խմբագրման.
«Իմ օլիմպիական համբերությունը համառորեն չարաշահող քաղաքական դաշտի՝ իրենց осетрина-ի տեղ դրած շերեփուկներին և օժանդակ բանվորուհիներին, որոնք ընտանեկան «սոխակի» դեր են կատարում, ուզում եմ հիշեցնել, որ օդում պտտվող համառ լուրերի համաձայն, ՀՀԿ-ի «յուղալի» սեղանների մոտ երկյուղալի դեմքով թերմացք «փախցնելիս»՝ ձեզ շատ տեսնողներ են եղել... դուք իգնոր վիճակից մի հատ դուրս եկեք, նոր հրաժարական պահանջեք...
Հ.Գ. ինչ հիշաչար մարդիկ դուրս էկաք, երկու տարիա չեք մարսում ձեր պարտությունը...»:
Նկատենք, որ նոր իրողությունների պայմաններում Մամիկոն Ասլանյանի նման գրառումը իսկական սառը ցնցուղ կարող է դառնալ Էդմոն Մարուքյանի, իր եղբոր՝ Քրիստ Մարուքյանի, ով մասնակցում էր Վանաձորի քաղաքապետի ընտրություններին, և իրենց թիմակիցների համար: Փաստորեն, Ասլանյանը հստակ պատասխան է տալիս՝ նոր կառավարությունը ոչ մի կերպ իրեն չի անհանգստացնում՝ նույնիսկ այն դեպքում, երբ իշխանության եկած քաղաքական ուժի հետ նույն դաշինքում են գտնվում:
Մամիկոն Ասլանյանի այս ինքնավստահությունը նաև հանգեցնում է այն մտքին, որ քաղաքական հենարանն արդեն ստեղծել է և Էդմոն Մարուքյանի հետ կարող է խոսել այնպես, ինչպես Մարուքյանն է երկար ժամանակ իր հետ խոսում՝ մեղադրանքներով և քամահրանքով և, որ ամենակարևորն է, դուխով: Փաստորեն, Մարուքյանն այս իշխանափոխությունից հետո քայլ չարեց և մնաց նույն դիրքում, անգամ Վանաձորից սկսեցին հեգնական արտահայտվել իր հասցեին: