Ինչո՞ւ չեն բռնում «Վեոլիա Ջուր»-ի քթից ու պատասխանատվության ենթարկում՝ համատարած ջրանջատումների բարոյական և նյութական վնասների համար
Հատկապես այն դեպքերում, երբ համատարած ջրանջատումներ են, «Վեոլիա Ջուր» ՓԲԸ-ի թեժ գիծը կաթվածահար է լինում։ Ուզում ես՝ զանգիր առավոտից մինչ ուշ երեկո, հեռախոսից լսվում է նույն հոգնեցնող ու նույնիսկ երբեմն նյարդայնացնող ձայնը՝ «մեր բոլոր օպերատորներն այս պահին զբաղված են․ հաղորդագրություն թողնելու համար սեղմեք 9»․․․
Չենք քննարկում այն, որ շատ հաճախ նույնիսկ օպերատորների հետ անմիջական զրույցն արդյունք չի տալիս, ուր մնաց թե հաղորդագրությունը պատշաճ արձագանք գտներ։
Թեժ գծից հույսը կտրելով՝ NEWSPRESS.am—ը զրուցեց ընկերության մամուլի քարտուղար Մուրադ Սարգսյանի հետ՝ պարզելու համար, թե ինչո՞ւ են ամռան այս տապ օրերին մայրաքաղաքում համատարած ջրանջատումներ լինում։
Թեև կասկած չկար, որ նման հարցադրում Մուրադ Սարգսյանն այս օրերին առաջին անգամ չէր ստանում, սակայն պատասխանեց, որ տեղյակ չէ։
«Ճիշտն ասած՝ հիմա ես չեմ տիրապետում ինֆորմացիային, բայց ենթադրում եմ՝ կա՛մ ջրի սպառման ծավալների ավելացման հետ է կապված, կա՛մ վթարի: Քանի որ հանպատրաստից չեմ կարող ասել, հաղորդագրություն ուղարկեք, սահմանված ժամկետում կպատասխանենք»,- ասաց Մուրադ Սարգսյանը՝ հավելելով, որ սահմանված ժամկետը քաղաքացիների համար 10 օր է, իսկ լրատվամիջոցների համար՝ 5 օր։
Հարկ ենք համարում արձանագրել, որ ջրամատակարարման հետ կապված ցանկացած հարց, այն էլ՝ ամռան շոգին, հրատապ է բոլոր ջրօգտագործողների համար․․․
Թերևս նյարդայնացնող և նաև վիրավորական է Մուրադ Սարգսյանի ու ընկերության մյուս բոլոր աշխատակիցների անտարբեր ու արհամարհական վերաբերմունքը խնդրին։ Մասնավորապես՝ ուշագրավ է այն, որ երբեք այդ օրերին թեժ գիծը չի պատասխանում, իսկ ընկերության «մուրադսարգսյանները» հարցերին տալիս են լղոզված ու չհուսադրող պատասխաններ։
Իհարկե, ակնհայտ է, որ ամռանը ջրի սպառման ծավալներն ավելանում են, ասենք, բիզնես կամ այլ նպատակներով լցվում են օլիխարխների ու մասնավոր ընկերությունների լողավազանները, բայց հարկ է նկատել նաև, որ ընկերության համար սա նորություն չէ, ու այն, որ նրանք չեն կարողանում կանոնակարգել ջարմատակարարումը, դա միայն «Վեոլիա Ջուր»-ի ղեկավարների անփույթ ու անկազմակերպ աշխատանքի արդյունք է։
Այս կերպ խախտվում են նաև ջրօգտագործողների ջրամատակարարման և ջրահեռացման համակարգի միացման առավելագույն ժամկետները։ Ու հետաքրիքր է, թե այս պարագայում ինչու տեղից չի շարժվում Հանրային ծառայությունները կարգավորղ հանձնաժողովը։ Ու եթե հատուկ պայմանավորվածություն չկա լիտրերով ջուր վաճառող ընկերությունների հետ, ապա վաղուց արդեն ժամանակն է «Վեոլիա Ջուր» ընկերությանը «քթից բռնելու» ու պատասխանատվության ենթարկելու։ Հատկապես որ «Վեոլիա Ջուր»-ը, առանց մի վայրկյան իսկ անգամ վարանելու, ինքը կբռներ ցանկացած մեկի քթից, եթե հանկարծ այդ մեկը ջրի վճարները գեթ փոքր-ինչ ուշացներ։