Սերժ Սարգսյանն անդրադարձել է «Մերժիր Սերժին» շարժմանն ու բազմաթիվ հարցեր ուղղել կազմակերպիչներին
Սերժ Սարգսյանը «Շանթ» հեռուստաընկերությանը տված հարցազրույցում Լեռնային Ղարաբաղի կարգավորման վերաբերյալ հարցին պատասխանելիս, սահուն անցում կատարեց նաև Նիկոլ Փաշինյանի նախաձեռնած՝ «Մերժիր Սերժին» շարժմանն ու դրա նպատակներին:
«Պատկերացնո՞ւմ եք՝ հայ զինվորի և սպայի հոգեվիճակը, երբ ինքը սահմանին է, իսկ իր փոքր եղբայրն ու քույրը չեն գնում դպրոց, որովհետև մեկը որոշել է, որ այդ մարդիկ չպիտի գնան դպրոց: Ովքեր փորձում են անօրինական ճանապարհով անհամաչափորեն ուրիշների իրավունքները խախտել, մի պահ պիտի կանգնեն ու մտածեն՝ էս ի՞նչ ենք անում, իսկ ո՞ր երկրում են հաջողության հասել՝ ունենալով այդպիսի պրոբլեմներ, ո՞ր երկրում են կարողացել հաջողության հասնել անկայունության միջոցով: Բոլորի համար պարզ է, չէ՞, թե անկայությունն ինչ է բերելու: Եվ ընդհանրապես, գործողությունների մեջ պե՞տք է տրամաբանություն լինի, թե՞ չէ: Ո՞րն է տրամաբանությունը: Լա՛վ, ենթադրենք՝ պրոցեսը տեղի չի ունեցել, ենթադրենք՝ իրենք խափանել են, խափանել են հաջորդ անգամ: Ի՞նչ է լինելու հետո: Սահմանադրության համաձայն՝ Ազգային ժողովը պետք է ցրվի: Ո՞վ է ձևավորելու նոր Ազգային ժողով՝ էն 20-30 հոգի՞ն: Ո՞վ: Ո՞նց են ընտրություն կազմակերպելու: Էդ նույն ձևո՞վ: Ուժով մտնելու են տուն, մարդկանց բերեն ընտրատեղամաս, ասեն՝ քվեարկեք: Ախր գործողությունը պետք է նպատակ ունենա»,- ասաց Սարգսյանը:
Նորընտիր վարչապետը նշեց, որ ինքն ինչ-որ կերպ հասկանում էր ցուցարարների նպատակը՝ ցանկանում էին, որ ԱԺ նիստը չկայանա, բայց այժմ, երբ նիստն արդեն կայացել է, Սերժ Սարգսյանը չի հասկանում նրանց ուզածը.
«Իրենք չէին ցանկանում, որ Ազգային ժողովի նիստը տեղի ունենա, բայց տեղի է ունեցել, հիմա ի՞նչ են ուզում, ուզում են գալ, մտնել էս շենք (Բաղրամյան 26 - հեղ.) իրե՞նք կառավարել: Ենթադրենք՝ ինչ-որ մի պահ իրենց դա հաջողվեց: Հետո՞: Իրենց ո՞վ է ընդունելու: Իրենք, ի՞նչ է, դառնալու են լեգիտիմ իշխանություն: Սերժ Սարգսյանը լինելու է ոչ լեգիտի՞մ, ժողովրդին գրգռո՞ղ, իսկ իրենք՝ ժողովրդին հանգստացնո՞ղ ու լիգիտի՞մ»,- հռետորական հարց ուղղեց Սարգսյանը:
Ըստ նրա՝ երբ մարդկանց գործողությունների մեջ տրամաբանություն չկա, շատ դժվար է հասկանալ, թե դեպքերը դեպի ուր կզարգանան:
«Ցավոք սրտի, մենք մի անգամ անցել ենք այդ դառը ճանապարհը: Եթե ուզում են երկրորդ անգամ անգամ անցնենք՝ ի՞նչ ասեմ: Բայց Հայաստանի և՛ իշխանությունները, և՛ իրավապահները ևս ունեն այդ փորձը, և ամեն ինչ անելու ենք, որպեսզի խուսափենք, որովհետև այսօր՝ այս պահին, երթ իրականացնողների մեծ մասն ուղղակի հետաքրքրությունից դրդված են դա անում, բայց մեր քաղաքացիներն են, որոնց հետ մենք ընդհանրապես խնդիրներ չունենք, էն մի քանի տասնյակի հետ էլ չունենք, ամենայն հավանականությամբ իրենք ունեն մեզ հետ: Բայց լավ կլինի՝ էդ խնդիրները չփաթաթեն բոլորի վզին»,- ամփոփելով՝ ասաց վարչապետ Սերժ Սարգսյանը: