Թուրինցիները հայհոյեցին ու սուլեցին, իսկ Բոնուչին զայրացավ ու պատժեց․ Ինչո՞ւ․․․
Իտալիայի առաջնության հերթական տուրում մրցեցին երկրի ամենատիտղոսակիր 2 թիմերը՝ «Յուվենթուսն» ու «Միլանը»։ Հանդիպումն ավարտվեց «Յուվենթուսի» հաղթանակով՝ 3-1 հաշվով։ Հանդիպումը կարևոր ու դրամատիկ էր ոչ միայն խաղային տեսանկյունից, այլև ինտրիգի առաջին պատճառն ամառային տրանսֆերային պատուհանի ժամանակ թիմի ֆուտբոլիստ Լեոնարդո Բոնուչիի «Միլան» տեղափոխությունն էր։ Մինչ օրս վերջնական բացատրություն չկա այս տրանսֆերին, թե ինչու Բոնուչին լքեց «Յուվենթուսն» ու գնաց «Միլան»։
Մինչ Բոնուչիի «Միլան» տեղափոխությունը, իտալական պարբերականները նշում էին, որ Լեոնարդոն խնդիրներ ունի թիմի գլխավոր մարզիչ Ալեգրիի հետ։ Նախորդ մրցաշրջանում նույնիսկ եղավ մի հատված, որ Բոնուչին չէր հայտավորվում «Յուվենթուսի» մեկնարկային կազմում։ Այդ ժամանակ արդեն լուրեր էին պտտվում, որ հաջորդ տարի նա կտեղափոխվի «Բարսելոնա»։ Սակայն ամառային տրանսֆերային պատուհանի ժամանակ նա գնաց «Միլան»։
Տրանսֆերից հետո Բոնուչին մի փոքր բացեց փակագծերն ու նշեց, որ նրա հեռանալը կապված է Ալեգրիի ու թիմի ղեկավարության հետ, քանի որ թիմի առաջ 2 մարդ կար՝ ինքն ու Ալեգրին։ «Յուվեն» ընտրեց Ալեգրիին, ու արդյունքում Լեոն եկավ «Միլան»։
Հիմա անդրադառնանք հանդիպմանը։ Հանդիպման հենց առաջին վայրկյանից «Թուրինն» ուղղակի «կերավ» Բոնուչիին։ Շատերը վստահ էին, որ այդպիսի արձագանք չի լինի, սակայն եղավ այն, ինչ եղավ։ Ու այդ ամենից զայրացած Լեոն, ով 7 մրցաշրջան նվիրվեց թիմին, 7 մրցաշրջան պայքարեց, դարձավ աշխարհի լավագույն պաշտպաններից մեկը, գրավեց Բուֆֆոնի դարպասն ու տոնեց գոլը։
Հանդիպումից հետո թիմի թվիթթերյան էջում երկրպագուները շարունակեցին հայհոյել Բոնուչիին։ Իսկ Լեոն հայտարարեց, որ այդ գոլն էմոցիաների պոռթկում էր։ Լեոն նաև շեշտեց, որ 7 մրցաշրջան նվիրվել է «Յուվենթուսին»։
Մի՞թե Բոնուչին Հիգուայինն է, ով առանց պատճառ լքեց «Նեապոլը»։ Մի՞թե Լեոն Նեյմարն է, ով իբր «Ոսկե գնդակ» ստանալու համար վազեց միլիոնների հետևից։ Պարզապես պետք էր հասկանալ, որ Լեոն տուժեց այնպես, ինչպես տուժեցին Ժոզե Մուրինյոյի ձեռքի տակ ընկած ֆուտբոլիստները։ Ալեգրին Ժոզեն չէ, սակայն այդ պահին թիմի կշեռքի նժարին Ալեգրին էր ու Բոնուչին։
Ինչո՞ւ «Մանչեսթեր Սիթի» տեղափոխված Ֆրենկ Լեմպարդին սուլոցներով չընդունեցին «Չելսիում»։ Ինչո՞ւ «Յուվենթուս» տեղափոխված Անդրեա Պիռլոյին սուլոցներով չընդունեցին «Միլանում»։ Քանի որ «Չելսիի» երկրպագուները գիտակցեցին, որ Լեմպարդը թիմի համար նվիրել է իր կյանքը, քանի որ պայքարել է, օգնել, որ թիմը տիտղոսներ ստանա։ «Միլանում» նույնպես գիտեին, որ Պիռլոն իրենց համար մեծ ֆուտբոլիստ է, ով հեռացավ, քանի որ ոմանք դրդեցին ու այդպես ուզեցին։
Իսկ «Յուվենթուսում» չգիտակցեցին այդքանը։ Երկրպագուները որոշեցին սուլել, հայհոյել ու բարկացնել Բոնուչիին։ Իսկ Բոնուչին Թուրինին պատասխանեց այնպես, ինչպես իրեն ընդունեցին։ Այնինչ նրան պիտի ծափահարեին, քանի որ Լեոն արժանի է դրան, քանի որ Լեոն 7 մրցաշրջան նվիրվել ու դեռ այդքան էլ պատրաստ էր պայքարել «Յուվեի» համար։ Քանի որ Բոնուչին դարձավ մարզչի զոհը։